Enzo-a'n Chelsea chhuahsan duh

Chelsea midfielder pawimawh Enzo Fernandez chuan Stamford Bridge chhuahsan a duh a, Real Madrid nen pawha sawi zawm lo hlawh tawh midfielder lei ngam tur erawhin hausak a ngai dawn!

Kum 25 mi Enzo hi Blues hian January 2023 khan pound maktaduai 107-in an lei a, hei vang hian Benfica aṭanga an lakluh midfielder hi an hralh dawn a nih chuan £120mtd tal hmuh an inbeisei.

Argentina midfielder hian Blues-ah hian kum 2032 thleng contract a nei hrim hrim a, a man a tlawm thei lo. Enzo agent Javier Pastore chuan a player club thar tur hi a zawng mek nia sawi a ni a, Real hming a ri ring hle.

Mahse, Manchester City midfielder Rodri nen pawha sawi zawm Real hian Enzo man zat hi an ngam lo a, player hralhna aṭanga sum tam tham tak an hmu a nih loh chuan bawhzui an tum lo.

Blues boss hlui Enzo Maresca enkawlna hnuaia khel tur City hming pawh lam rik a ni a, mahse, City hian Nottingham Forest midfielder Elliot Anderson lakluh phawt chu thupui berah neih an tum rih nia sawi a ni.

French club Paris St-Germain hming pawh lam rik ni mah se, Luis Enrique-a team lam hian lakluh tumna an neih loh thu an sawi a, Enzo hian chhuah duh viau mah se, a man avang hian Stamford Bridge-ah a cham lo ang tih a sawi theih loh.

Enzo hian season hman zawh takah khan Chelsea tan match 54-ah goal 15 khungin, assist vawi sarih a nei. Blues hian 10-na ni chungin Premier League season an khar a, season tharah European football an khel dawn lo - hei hi Enzo chhuah duh chhan pawh niin a lang.

Hetihrual hian Real Madrid coach hlui Xabi Alonso-a'n Chelsea hi season thar aṭangin a enkawl dawn a, season hman zawh tak ang mai chu an ni lo ang.