Monaco coach thar tur Filipe Luis

French club hlun AS Monaco chuan season tharah an team enkawl turin, Brazilian coach Filipe Luis chu an la lut dawn niin journalist rintlak Fabrizio Romano chuan a sawi a, Filipe Luiz-a'n Ligue 1 club a enkawl hmel ta hle.

Atletico Madrid defender hlui hian inkhelh a chawlhsan hnuah coaching a luhchilh a, an ram club lar Flamengo-ah youth team a enkawl phawt. 2024 khan senior team enkawl tura rawih a ni a, Tawnhriat ngah lo mah se Filipe Luis a duai lo a, Flamengo tan nomawi panga a chawi tawh a, Europe club langsarten an ngaihven.

Chelsea tan pawha khel tawh Luis hi Monaco hma hian club dang nen sawizawm a lo ni tawh a, an zingah Bundesliga club Bayer Leverkusen chu a langsar pawl an ni. Leverkusen hian tun hnaia chhuak tur anga an ngaih an coach, Kasper Hjulmand thlak nan Luis hi an duh a, mahse a tawpah Monaco zawk a zawm dawn.

Monaco hian Filipe Luis hi kum hnih daih contract an ziahpui dawn a, 2028 thleng Monaco-ah a awm ang. Monaco hi tun hnaiah an tlahniam a, season hman zawh takah pawh khan Ligue 1-ah pasarihna a ni. Monaco hian sang taka an club vawrh chho leh turin Filipi Luis an beisei ang.