Zaninah Joshua Van - UFC champion hmuhna hun ṭha

UFC flyweight champion Joshua Van chuan nimin khan Mizoram leilung a rawn rap ta a, zanin dar 8:00-a MISMA Fight Night chu Burmese-American fighter hian Special Guest ni chungin a hmanpui ang.

MISMA Fight Night hi R. Dengṭhuama Indoor Stadium, Mualpuiah neih a ni dawn a, fight hmuhnawm tak tak pali en tur a awm dawn - Joshua Van hmuh tur a awm dawn bawk a, Fight Night en man hi Rs. 300 chauh a ni.

'The Fearless' hminglem an pek fighter hian MMA-ah professional fight vawi 19 hmachhawn tawhin, vawi 17 hnehna a chang a, vawi kua a khingpui knockout tawhin, vawi hnih a tlawm.

December 6, 2025 khan a vawi khat nan UFC-ah title fight a hmachhawn a, fighter lar Alexandre Pantoja nen inhmachhawnin, champion lai hi round khatnaah a inhliam nghal avangin Joshua hi a champion.

UFC fighter hmuhnawm ber pawl a ni chungin, Joshua hi a chak danah a vannei anga sawi a tam a, mi tam takin champion-ah an pawm lo. Mahse, Burmese fighter rothap hian May 9 khan amah sawiseltute ka a hupsak a, UFC 328-ah Tatsuro Taira chu technical knockout hmanga hnehin, a title a humhim.

Joshua-a'n a title a humhim hnuah Mizoram lam a hawi a, 'a champion belt pawh a la lum vat vat ang,' tih tur velah Mizoram leilung a rawn rap - Mizoram infiamna khawvel tan chuan thil thar leh ropui a tling a, a hmun en loh phal chi a ni lo.

R. Dengṭhuama Indoor Stadium-a MISMA Fight Night-ah hian ticket hi Rs. 300 man vek a ni a, ticket man to leh ṭhutna ṭha bik a awm lo - a kal hma apiang tan ṭhutna ṭha chan a ni dawn a, kal hma a fuh dawn tihna a ni.

MISMA Fight Night hi Mizoram sports minister Lalnghinglova Hmar chuan a hmanpui dawn a, ani bakah hian Asian MMA Federation senior vice president Sharif Bapu chuan a hmanpui dawn bawk.