Neymar a inhliam leh tawh
Brazil mipuiten World Cup-a hmuh an châk em em, an ram coach Carlo Ancelotti hnenah pawh squad-a telh ngei tura an ngen chamchi, huhang nei lian Neymar chu World Cup squad-ah tel ngei mah se, an match hmasa berah a inlan lo mai thei - Neymar hi chawn hliam vangin kar hnih emaw kar thum emaw vel chu a chawlh a ngai dawn.
Kum 34 mi forward hi World Cup inbuatsaih nana khelh tur friendly match pahnihah chuan a inlan thei dawn lo chiang a, June 1, Pathianni zing dar 3:00-a Panama nen an inkhel tur leh June 7, Pathianni zing dar 3:30-a Egypt nena an inkhel turah a inlan thei dawn lo ve ve.
Brazil hian tun World Cup-a an match hmasa ber chu June 14, zing dar 3:30-ah Morocco nen an khel dawn a, Neymar inlan lohna chance a sang ta hle. Brazil team doctor Rodrigo Lasmar chuan, "Neymar hian medical test ngai zawng zawng hmachhawnin, a chawnah hliam a nei tih hmuh a ni a, kar hnih emaw kar thumah chuan a dam hman ang," a ti.
World champion vawi nga ni tawh Brazil tana match 128-a goal 79 khungtu Neymar hian Thawhlehni khan Brazil team training a zawm a, mahse, a chawn na a tih hnuah test hi neih niin, hliam a nei tih hi hmuchhuah a ni a, chawn hliam (grade two) a nih thu an sawi.
Neymar hian Brazil camp a zawm hma hian a chawnah hliam hi a nei sa hrim hrim a, mahse, a club khelhna Santos lam doctor chuan vung satliah niin a sawi. National team training a zawm hnuah Brazil doctor-ten enfiah ve lehin, vung satliah ni loin, chawlh hahdam a mamawh tih hi an hmu chhuak ta a ni.
Kum 2014, 2018 leh 2022 World Cup-a Brazil tana inlan Neymar-a hliam hi na tak a ni hran lo a, chawlh hahdama dam mai thei tur niin an sawi. Brazil hi World Cup-ah hian Morocco bakah Haiti leh Scotland te chu group khata an awmpui a ni a, harsatna nei loin knockout round chu lut mai tura beisei an ni.
Panama nena an friendly match-ah hian, Champions League final khel tur, Arsenal player pahnih, Arsenal defender Gabriel leh forward Gabriel Martinelli bakah Paris St-Germain captain Marquinhos te chu an inlan thei rih dawn lo bawk.