Sinner a tla, French Open ngaihnawm sawt

French Open 2026-ah inelna hnuhnung pahnih champion Carlos Alcaraz hliam vangin a tel lo a, seeded no. 1 leh inelna hnuhnung ber finalist Jannik Sinner-a'n second round a paltlang lo. Italian star hian Ningani tlai khan world no. 56 Manuel Cerundolo chu 3-6, 2-6, 7-5, 6-1, 6-1 in a hneh lo.

Thilmak chu

World no. 1 Jannik Sinner hian kumin Grand Slam hmasa berah semifinal a thleng a, Novak Djokovic hneh loin a tla. Qatar Open-ah quarterfinal-ah Jakub Menšík hneh loin a tla leh bawk.

Mahse, hemi hnu hian Sinner-a theihna tak a rawn lang a; Indian Wells, Miami Open, Monte Carlo Masters, Madrid Open leh Italian Open-ah a champion vek. Sinner hian kumin ringawtah nomawi panga a chawi a, clay specialist Alcaraz a inlan loh bawk avangin French Open-ah champion rinkai lawrlak a ni.

Sinner hian first round-ah Jakub Menšík 6-1, 6-3, 6-4 in a hneh a, second round-ah pawh 6-3, 6-2, 5-1 in hma a hruai hman. Mahse, khawlum vangin Sinner a buai a, a chet danah ngai a awh lo tih a lang.

World no. 1 ball vuak chu a hma aiin 10mph-in a rawn muang a, 5-4 a nih chhoh tak avangin a trainer a ko a, medical time out lain set tawp ber zelah hun rei tak a chawl. Hetiang boruak karah hian Cerundolo a talbuai phah lo a, a ngai renga khelin 7-5, 6-1, 6-1 a set hnuhnung pathum lain Sinner a hneh.

Champion thar?

French Open-ah Rafael Nadal a chungnung fal a, kum 2005 aṭanga 2022 thleng khan vawi 14 a champion. Nadal-a champion karah Roger Federer (2009), Stan Wawrinka (2015) leh Novak Djokovic (2016, 2021, 2023) te chauh an champion.

Nadal bakah Federer leh Wawrinka ten inkhelh an chawlhsan tawh a, champion lai Alcaraz a tel lo bawk a, champion nawn thei awmchhun chu Djokovic chauh a ni tawh. Serbian star hian second round-ah Valentin Royer chu 6-3, 6-2, 6-7 (7-9), 6-3 in a hneh.

Tun ṭum inelnaah hian Djokovic hi seeded no. 3 ni mah se kum 39 mi a nih avangin nomawi chawi a harsa dawn. Chutihrualin Sinner leh Alcaraz te an awm loh avangin champion tura rinkai a ni ta thung.

Chutihrualin Grand Slam-a la champion lo Alexander Zverev tan hun ṭha a inher chhuak ve thei bawk. Seeded no. 4 Félix Auger-Aliassime bakah Ben Shelton (5), Alex de Minaur (8) leh Flavio Cobolli (10) te pawhin tun hi champion theihna hun ṭha tih a hre bawk ang.

Sinner chauh hi seeded sang 10 zinga tla awmchhun a ni lo a; Italian tennis star bakah hian Daniil Medvedev (6), Taylor Fritz (7), Alexander Bublik (9) te first round-ah an tla tawh. Djokovic a champion a nih ngawt loh chuan champion thar an awm dawn a, seeded no. 1 tla hian French Open boruak a tinung dawt thei ang.