FIA president-in an term tihdanglam a duh

Motor hmanga inelna thuneitu sang Federation Internationale de l'Automobile (FIA) president, Mohammed Ben Sulayem chuan president te term, mi pakhat tan kum 12 chu pawhseia tiam chin awm loa term chelh thei turin rawtna a siam a, June thlaa FIA General Assembly-ah member ten an pass pui a ngai dawn thung.

Dan awm laiah chuan FIA president te hian term khatah kum li zel an nei a, term thum chhung president hna hi an chelh thei a, mahse a aia rei president an ni thei lo. Hei hi Ben Sulayem hian thlak a rilruk a, president te chu kum 12 aia tam ni thei tawh turin rawtna a siam

Tuna FIA dan hman mek hi hi Ben Sulayem hmaa president lo ni ṭhin, Jean Todt-a siam a ni a, Todt hian Max Mosley a thlak hnua a siam a ni. Todt 2009-2013 leh 2017-21 khan president hna hi a lo chelh tawh.

Kum 64 mi Ben Sulayem hi nikum December-a inthlah khan, thil dik tawk lo leh sawi zui hlawh takin midang ding thei loin a lo siam tawh a, khingpui nei loa thlan tlin leh a ni. A duh dan hi pawmpui a nih chuan dan awm sa, kum 12 aia rei president nih theih loh chu a nghing nghal dawn a, president a nih hun chhung hi pawhseiin a awm dawn tihna a ni.

Hetihlai hian mi tam tak chuan, Ben Sulayem chu mahni ṭanghma a hai vang leh a duhâm vangin hetiang ngaihdan hi a neiah an ngai a, president a nih lai reng a hetiang thil a duan chhuah bakah, inrelbawl danah a dik tawk loah ngaiin president ni zui zel turin an duh lo hle.