Thih leh dam inkara leng Spurs an chak

San Antonio Spurs chuan nimin zing khan 118-91 in Oklahoma City Thunder an hneh a, best of seven series-ah 3-3 in an inhnehtawk chiah. Thih leh dam kara leng Spurs-in awlsam taka tlawm nawn an tum lo a, an dinhmun tichiang turin match khat chiah chak a ngai tawh.

Frost Bank Center, San Antonio-a inkhelah Spurs an nung nghal a, match hmasaa beisei pha lo Victor Wembanyama hoin an khel ṭha a, an kut a kal nghal a, first quarter-ah point 35 score-in 35-22 in hma an hruai. Second quarter-ah Thunder-in hma an sawn hret a; Jared McCain, Chet Holmgren bakah Cason Wallace ten three points an nei a, inkhel a nun phah hle.

Mahse Spurs an inthlahdah bik lo a, Wemby-a'n three points hmangin a chhan let bakah paint area-ah an ngam lo a, French center hi Dylan Harper, Stephon Castle leh Devin Vassell ten an thlawp ṭhat bawk avangin an inkar zim tur an dang. Spurs-in 60-53 a hmahruai chungin chawlhlawk an hmang.

Halftime chawlh laiin Spurs an infuih ṭha tih a hriat a, third quarter-ah quarter dang zawng aiin an khel ṭha. Vassell, Julian Champagnie te kut a kal sawt emaw tih tur a ni a, Wemby hoa an defence a khawng bawk avangin an inkar an pawt zau. Point 32 score-in point 13 chiah OKC-in an score a, 92-66 in third quarter an khar.

Fourth quarter-ah Thunder-in theihtawp chhuahin an bei let a, Isaiah Joe leh Kenrich Williams te an phur thar. Amaherawhchu third quarter an khelh chhiat an tuar a, Spurs an inthlah dul duh tawh bik loh avangin point 27-a hnufual zawk chungin a tlawm zawkah an ṭang.

OKC tan Shai Gilgeous-Alexander chu a khel ṭha tawk lo a, kum zawna MVP ni thei SGA hian point 15 chauh a score thei a, a team-in an mamawh laiin a bo. SGA hian game 7-ah free throw a hlawhchhuah hnem loh pawha point a ngah loh chuan, OKC tan champion nawn beiseina a thamral thei dawn.

Canadian shooting guard Shai bakah Alex Caruso a langsar lo a, a defence ṭhat vanga hriat hlawh Caruso hian finals khelh tawhah, defence chauh lo pawh a thiam tih a lantir tawh a, game 6-ah erawh a thiam lo ve ve emaw tih turin a khel ṭha lo.

Spurs erawh game 6 nen khaikhinin team thar ang an ni a, Wemby-a'n point 28 a score-in rebound vawi 10 a la. Kum 22 mi Wemby a khelh ṭhat leh tawh avangin Spurs an phur sawt ang. Wemby bakah Dylan Harper (18), Stephon Castle (17) leh Devin Vassell (12) ten Spurs chak nan an thawh hlawk hle.

Team pahnihte hi May 31, Pathianni zing dar 5:30-ah an inhmachhawn leh dawn a, a chak zawk zawk chu Western Conference Champion an nih bakah NBA Finals-ah New York Knicks nen an inkhel dawn a, a chak lo zawk tan beisei tur a awm tawh dawn lo a, inkhel hmuhnawm a beisei ngam.