London khawpuia chak nei lo India

Indian football team chuan London khawpuiah beiseina sang tak nen Unity Cup khel mah se, team tel pali zinga a hniam ber ni chungin, inelna an mangṭha - Inrinni zan khan an match hnuhnung berah Zimbabwe chu 1-0 in an ngam lo.

Blue Tigers hian match hmasa zawkah Jamaica chu 2-0 in an lo ngam lo tawh a, Inrinni zanah Nigeria ngam lotu Zimbabwe nen pathumna inchuhin an inkhel - India-in ṭul lo taka penalty chawiin, 1-0 in an tlawm phah.

India hian minute 33-naah ṭul lo taka Farukh Choudhary-a foul chu an tuar a, penalty an chawi. Zimbabwe tan tawnhriat nei ṭha Prince Dube chuan penalty hi goal-ah a chantir a, 1-0 in hma an hruai.

Blue Tigers hian si phurh sut tumin, theihtawp chhuah mah se, European football khel phak player kawl nualtu Zimbabwe an ṭha hret a, India an tlawm nawn.

India tan Lallianzuala Chhangte chuan inkhel bul ṭanin, Lunglei tlangvalin danglamna thlen tum ṭhin mah se, a vanneih zan a ni lo a, a shot ṭha zet, goal ngei tura ngaih tawh Zimbabwe keeper-in a dansakte chu a ui vawng vawng ang.

Blue Tigers squad-a Mizo awm ve dang Edmund Lalrindika'n Jamaica lakah bul ṭan mah se, Zimbabwe lakah erawh bench-ah a awm. East Bengal forward hi minute 83-naah luhtir a ni a, Lunglei forward tan danglamna thlen turin a tlai hret tawh.

India hian June 5 leh June 9-ah Tajikistan nen international friendly match an khel zui dawn a, hei vang hian India lama lo haw loin, London aṭang hian Tajikistan lama inkhel turin an kal zui ang.