Anthony Gordon-a'n Barcelona a zawm

Newcastle United forward Anthony Gordon chuan Barcelona a zawm a, Spanish champion hian English forward lakluh nan hian pound maktaduai 69.3 an inseng.

Kum 25 mi Gordon hian Barcelona tan kum 2031 thleng khel turin contract a ziak a, Bayern Munich pawhin lakluh tumin hel ve mah se, a ngam huai zawk Catalan club a zawm.

Gordon chuan, "Kum thum mi lek ka nih lai aṭang tawhin, Barcelona tana khelh hi ka châk ṭhin," a ti a, mipui mak tih turin English forward hian Spanish ṭawng ngatin press conference a hmachhawn.

England international chuan, "In awih emaw, awih lo emaw pawh ni se, naupang tê ka nih lai aṭang tawhin, Barca tana khelh hi ka châk ṭhin a, kha vang khan Spanish ṭawng thiam lawk hi ka duh ṭhin.

"Newcastle-ah physio ka nei ṭhin a, ni tin Spanish ṭawngin kan inbe ṭhin. A bulah pawh, 'Engtikah emaw chuan Barca tan ka la khel dawn a, Spanish ṭawng zir ka duh a ni,' tiin ka hrilh," a ti!

Gordon chuan sawi zawmin, "Barca-in min duh tih hi ka hre tlai khawp a, mahse, anni'n min duh tih ka hriat kha chuan thil dang a leng tawh lo. He club hi khawvela club lian ber a ni a, Barca tana khelh hi ka duh a ni," a ti a, a mumangte a tak ram an chan thu a sawi.

Anthony Gordon hian season hman zawh takah khan, Newcastle tan inelna hrang hrangah match 46 khelin goal 17 a khung a, assist vawi nga a nei.

Barcelona hian an squad-ah Marcus Rashford an nei sa a, mahse, Manchester United aṭanga loan-a an hawh forward hi £26mtd-a a ngheta lakluh theihna dan an nei chungin hmalakna langsar a la awm rih lo.