Real Madrid coach thar Jose Mourinho

Spanish club ropui Real Madrid chuan coach atan Jose Mourinho an la lut ta a, Portuguese manager hian a club hlui Real coach ni tur hian kum thum chhung atan contract a ziak.

Hetihrual hian Mourinho hi Real coach ni lo leh thut thei a ni - June 7-ah Real hian club President thar an thlang dawn a, president ni lai Florentino Perez leh Enrique Riquelme te an inel ang.

Real president nih tum Riquelme hi Real Madrid president a ni a nih chuan Jose Mourinho hi Real coach a nih chhunzawm a rinawm lo a, Riquelme hian coach lakluh tur a neih sa tawh thu a sawi.

Khawthlang media ṭhenkhat chuan, Riquelme hian Real President a nih chuan Arsenal coach ni lai Mikel Arteta lakluh a tum dawn niin an sawi a, player langsar tak pahnih lakluh a tum bawk.

Mahse, Perez hi kum 2009 aṭang khan Real President a la ni char char a, kum 37 mi Riquelme tan Florentino Perez petchhuah a harsa deuhin a rinawm - chuti a nih chuan Mourinho hi Real coach a nih chhunzawm a rinawm zawk.

Mourinho hian kum 2010-2013 inkar khan Real Madrid hi lo enkawl tawhin, La Liga, Copa del Rey leh Spanish Super Cup-ah te a champion pui. Hman ang khan Mourinho ropui tawh lo mah se, Real buaina chhungril zawk ngaihtuahin, coach atana Perez-a'n a ko kir hi a awm lo hran lo.