Tottenham-in Senesi an hnaih

Tottenham Hotspur chuan Bournemouth defender Marcos Senesi chu free transfer-in lak luh an tum a, mimal thila inremna an nei hnai tawhin Senesi hian Spurs-ah kum li daih contract a ziakd awn niin journalist Fabrizio Romano-a'n a tarlang.

Kum 29 mi Senesi hian tun season-ah Bournemouth tan Premier League match a khel kim vek a, paruknaah season kharpuiin an club chanchina a vawi khat nan Europe-ah an inlan dawn.

June 30 hian a contract neih lai a tawp tawh dawn. Cherries hian an defender rinrawl hi thlun ngheh tum mah se, amah Senesi berin nikum December khan a lo hnawl tawh a, hemi hnu hian Cherries-in contract thar an zawrh tawh loh avangin a thlawnin tun nipuiah a chhuak dawn.

Argentine defender hian 2022-ah Feyenoord aṭangin Bournemouth a zawm a, match vawi 128 inlansak hmanin a khel ṭha thei hle. Club hrang hrangin Senesi hi an lo rim tawh a, mahse Cherries-ah châm a thlang a, a contract a tawp tawh dawn miau avangin a chauh a rinawm tawh.

Hetihlain hian Spurs hi tun season-ah beisei an pha lo a, 17-na niin Premier League-ah an inhamtang thei hram a, an tan season chhinchhiah tlak a ni lo. Season tharah Roberto de Zerbi hoin indinthar leh an tum a, thawhchhuah leh an tumna kawngah Senesi an duh. Senesi hma hian Liverpool aṭangin Andy Robertson chu, a thlawn thoin an lo la tawh bawk.