Rosberg leh Hamilton inelna ang duh lotu Antonelli

Mercedes driver Andrea Kimi Antonelli chuan, 2014 Bahrain Grand Prix-a Lewis Hamilton leh Nico Rosberg te inelna ang chu a teammate George Russell nen neih a duh loh thu a sawi.

May 25, Pathianni zana Canadian GP neihah Mercedes driver pahnih te hi inlehpel tawn zak zakin hma an inhruai chhawk a, mahse lap 30-naah Russell a vanduai avangin inelna a hmachhawn chhunzawm thei lo. Antonelli erawh pakhatna niin a zawna vawi li a chakna a ni.

Inelna zawh hnuah Russell chuan kum eng emaw zat hnua inelna ropui ber niin a sawi a, 2014 Bahrain GP-a Lewis Hamilton leh Nico Rosberg te chu Antonelli nen an inelna nen a tehkhin a, nuam a tih thu a sawi bawk.

Mahse Antonelli ngaihdan a ni ve lo thung a, Italian driver chuan, "Hamilton leh Rosberg-a te awm dan ang kha neih ka duh lo a, team chhung boruak ṭhat loh phah hialna thil a thlen avangin thlen nawntir ve ka tum lo.

Russell nen kan inel ngei dawn a, mahse tawhsual tawh theihna tur leh midang chhiat theihna turin engmah tih kan tum lo. Mercedes hi chakpui ngei kan tum dawn a, mahse team chhungah boruak ṭha lo a awm loh nan theihtawp kan chhuah dawn," a ti.

Tun season-ah Russell-a'n bul a ṭan ṭha a, mahse Chinese GP hnuah a tlahniam hretin podium a loawn leh tawh lo. Race pathum a hmachhawn hnuah palina vawi hnih a ni a, inelna hnuhnung berah a car a chhiat avangin a tlan tluan thei lo bawk a,

A teammate kum 19 mi Antonelli erawh a san zel avangin, Russell chungah beisei a sang lo thei lo a, hetiang boruak karah hian tun hnaia chanchin ngah tak, Red Bull driver Max Verstappen chu Russell thlak turin Mercedes-in an duh nia sawi a awm bawk.

Russell erawhin chhuah a duh thu a la sawi lo a, a teammate Antonelli nen an inkarah pawh boruak ṭha lo a awm lo niin a sawi bawk. Mahse Russell hi a chet ṭhat chhunzawm loh chuan Mercedes-ah a nghet reng bik lo ang.