A chung berah Anastasia hnehtu Hunthar

Mizoram rural Bank Pro Volleyball League khelh mekah Inrinni zan khan, champion tura rinkai pahnih Hunthar leh Anastasia Electric Veng te an inhmachhawn a, 25-19, 25-22, 25-14 (3-0) in hnehna an chang a, hmahruaitu ni chungin semifinal an lut.

PVL hi LPS Arena, Falkland-ah khelh a ni a, zaninah hmeichhe inelna neih a ni ve leh dawn. A hmuna inkhel en man hi Rs.50 chauh a ni a, LPS YouTube channel-ah (member only) hmangin a en theih bawk.

Hunthar an ṭha

Thutak Nunpuitu Team laka an chetsual hnuah Hunthar an insiamtha a, an khelh hnuhnung pahnihah chiang takin Tuichangral leh Anastasia an hneh zawn. Ball vuak tlak mai ni lovin lehlam hlap dan kawngah hma an sawn a, vuak an lak theih bakah Anastasia lakah ṭha takin an service a, chet an awlsam phah. Anastasia lakah pawh nung takin bul an ṭan a, el phak rual lohin an khel.

Set hnihnaah an vuak tlak ve theih loh avangin Anastasia an chiai a, service an lak chhiat bakah ball inchuh vanga point hloh an neih laiin lehlam tan Wilson Lalremruata, Suryansh Tomar leh Biakmuana'n an hlap tla a, 18-12-in Hunthar an fal.

Set hmasa aiin Anastasia-in nawr na zawk mah se Hunthar an ti nghing pha lo a, Kush chuan Suryansh-a vuak a dansak hnuah a vaw tla a, 22-24-in an hnaih hman tihin point hloh hun loah Zomuana'n a service sual.

Anastasia-in inrintawkna an hloh a, set thumna tir lamah Huntharin Kush Singh, Zomuana leh Ngursangzuala vuak an dang tla zawn. Helly Vanlalliana-a'n a vuak sual ve leh hnuah Biakmawia'n chiang takin Kush-a hlap a dansak bawk.

Chak tur a chian titih tawh avangin Huntharin khelhna hmun chang lo player ṭhenkhat an luhtir a, point 10 chuanga inthlau chungin inkhel a tawp a, chiang takin Hunthar an chak.

Suryansh Tomar chuan vawi 19 vaw tlain point kua a hloh a, Hunthar chakna hnar pawimawh ni zui zelin a vawi hnih nan Kuriz Player of the Match-a thlan a ni. Suryansh bakah 'blocker' Wilson Lalremruata leh Lalbiakmawia Khiangte te chu Hunthar chakna hnar an ni.

Anastasia an zuih

An match hnuhnung pahnihah Anastasia an tlawm zawn a, boruak sangah danglamna siam thei an neih lohna a lang. Karthik Madhu thlaktu Kush Singh-a'n a hma aiin ball a hmu hnem a, vawi thum a khelhnaah point 14 hmuin 11 a hloh a, mahse a team tan a tawk lo.

Hunthar hmaah team pum puiin vuak tlak an harsat avangin an bet tluan a, an innghahna Zomuansanga leh Laldinsanga'n point an hmuh zat an paih ral ve ve a, Electric Veng team a zawm hnuah Zosangzuala chet chhiat ber ṭum a ni bawk.

Tun season-a a vawi thum nan Anastasia an tlawm a, point 11 hmuin a chung ber aṭangin pahnihnaah an chhuk a, league round an khar dan a ṭhat tawk loh avangin champion lai hi team dangin an zuam sawt ang.

Hetihlai hian an elpui team dangin vawi khat theuh an la khel dawn a, semifinal hmain kar khat chuang insiamṭhat leh nan hun an nei ve thung, hniam lam pan thei an la ni bawk.