Bawihpuia Mem Cricket Tourney-ah UCC champion

Kolasib District Cricket Association chuan May 27-30, 2026 chhung khan Kolasib Sports Stadium-ah Bawihpuia Memorial Cricket Tournament an buatsaih a, UCC an champion.

Final hi May 30, Inrinni khan khelh a ni a, UCC hian over 20-ah run 112 siamin wicket sarih an hloh. Bawihpuia Cricket Club-in over 16.4-ah run 74 an siam a, an thih fai vek avangin UCC hi run 38-in an chak. UCC hian kumin March thla khan KC Pugal Memorial Tournament-ah an champion tawh bawk.

Best bowler atan wicket kua latu Arvind Shahi (UCC), best batter-ah run 122 vaw chhuaktu Ajit Rai (Bualpui) leh best fielder-ah Parveen Gurung (Bualpui) te thlan an ni a, UCC champion puitu Rajesh Chhetri chu player of the tournament-a thlan a ni. Inelnaah hian team sarih an tel a, tun ṭum inelna hi Laldinpuia Khiangte te chhungkuain an sponsor.