Arsenal leh Crystal Palace inhnehtawk

Siam thar lehna chang Arsenal chu an mikhual Crystal Palace nen goal awm loin an inhnehtawk. Mikel Arteta chuan an chak zawh loh chhan chu goal hmaah a hmawr an bawk theih loh vang niin a sawi.

Gunners hi kar thum liam ta khan Premier League aṭanga tlak hlauhthawnawmah an awm, chumi hnuah a zawna vawi nga an chak avangin beisei an nei sang hman - mahse Palace tlarhnung inremphui tak an paltlang thei lo.

Ningani zan inkhelah ball chang tam mah se Gunners tlarhmain goal an khung thei lo a, tun hnaia khel ṭha thei tak Alexandre Lacazette pawhin danglamna a siam thei bik lo - French forward hian a hun ṭha neih chu goal ban hrulah a pet chhuak.

Hliam tenau vangin Kieran Tierney a inlan thei lo a, a hmun ruakah Ainsley Maitland-Niles dah niin English defender hian tun hnaiah match a khel tam tawk lo tih a lang, goal nawr lamah a thawhhlawk tawk lo bawk.

Gabriel dam tawh mah se bench lamah dah a la ni, Rod Holding kawppui fuh tak Pablo Mari pawhin hliam tenau a neih avangin a khel thei lo - hliam dam hlim Thomas Partey chu hun tawp lam minute 20 chhung khelhtir niin danglamna a siam bik lo.

Rawlthar Bukayo Saka a chau tih a lang a, kum 19 mi player hi match zawng zawng khel tur chuan a tlin bik lo niin a lang - tun hnaia harh tharna thlentu zinga mi Emile Smith Rowe pawh khel ṭha viau mah se Palace tlarhnung su hawng turin a hriam tawk bik lo a ni.

Palace lamin counter attack aṭangin an vaw let ṭhin a, forward Wilfried Zaha-a'n penalty hlawh chhuakah inngai mah se pek a ni lo. James McArthur a tauh luh ngei tura ngaih chu goalkeeper Bernd Leno-a'n a lo dansak.

Roy Hodgson-a naute hian Sheffield United 2-0 a an hneh hnuah a zawnin match nga chu chak ni hmel an hmu tawh lo, Emirates Stadium-ah goal khung aiin a venhim an ngai pawimawh zawk a, an phu ang ngeiin point an sual chhuak.

Arsenal manager Arteta chuan, "Ball chang tamin hun ṭha pawh kan insiam hnem, mahse a hmawr kan bawk thei tlat lo, goal kan khung loh avangin chak kan phu zawk tia sawi ngawt theih a ni lo ang.

"Tun hnaiah match kan khel tam hle a, chuvang chuan player ṭhenkhat kha chu an chau tih a lang. Match tinin siamṭhat ngai leh hmasawnna tur lai a lo lang zel, khingpui goal bula chet dan kan zir belh a ngai," a ti.

Crystal Palace manager Hodgson chuan, "Ka naute khelh danah ka lungawi takzet. Tun hnaia khel ṭha em em mai kan hmachhawn a ni a, chutiang chung chuan kan tlarhnung a nghing lo a tih theih.

"Point hmu tur chuan goal chhuah loh hmasak a pawimawh a, tunah chuan kawng dik kan zawh ṭan niah ka ngai. Gunners mualah khan zirlai tam tak kan zir chhuak," tiin point khat an hlawhchhuah vanga a lawm thu a sawi.

Arsenal hian January 18, Thawhṭanni zan dar 1:30-ah Newcastle United an mikhual zui dawn. Crystal Palace pawhin Pathianni zanlaiah Pep Guardiola enkawl Manchester City an lenchilh chhunzawm ang.