Club inhal Manchester United leh Liverpool

Manchester leh Liverpool hi England hmarthlang lama awm an ni a, khaw inkar hi 56km lek a ni. Football club din hma rengin khaw pahnih hi ei leh bar lama hmasawnna kawngah an lo in el tawh a, kum zabi 18 lai vel kha chuan Manchester hi England hmar lam aiawhtu an ni. 

Amaherawhchu lawng chawlhna hmun an neih ṭhat chhawr ṭangkaiin Liverpool lamin kum zabi 19 tawp lam leh zabi 20-na tir lamah chuan Manchester hi an khum chho a, kumpinu rorelna hnuaia khawpui pahnihna ang hiala sawi a ni.

Manchester khaw sumdawngte bul tumin Manchester Ship Canal siam a ni a, tui kawng hi Manchester leh Irish tuipui zawmtu niin sumdawnna nghawng thei a ni. Livepool politician-te chuan nasa takin an do a, khaw pahnih inkar boruak a ṭhat loh phah hle. Kum 1984-ah Manchester Ship Canal zawh a ni a, Liverpool lawng chawlhna hnathawkte leh Manchester khuaa inhlawhfate inkar boruakin a vawrtawp a thleng zui a, hemi hnu thla thumah hian Liverpool leh Newton Heath (Manchester United hming hmasa) te chu a vawi khatna atan an intawng a, a inṭan chhoh danin a zir bawk avangin tun thlenga an inhal hi a mak lo!

Manchester United FC hi kum 1878 khan Newton Heath LYR FC tih hming puin an din a, inelna a an tel hmasak ber chu October 1886 daih niin 1886-87 season khan FA Cup first round-ah an inlan. 

Liverpool FC erawh Everton board leh club president John Houlding-te inhmuhthiam loh vangin 1892-ah din a ni thung. Everton-in Anfield chhuahsanin Goodison Park an pan a, Houlding-a'n stadium ruak hmang ṭangkai turin Liverpool FC a din thung.

Liverpool hian second division aṭanga bul ṭanin kum khatnaah season tluanin hneh loh an tawng lo. Blackburn khelmual Edwood Park-ah Reds hian Newton Heath nen  playoff an khel a, 2-0 a chakin first division-ah an inhlangkai a, an intawnna hmasa bera chak loh vangin Newton Heath erawh second division-ah an tla thla thung.

Scottish right half Alexander Matthew Busby-a'n hlawhtling taka Manchester City tan a khelh hnuah Liverpool tan vawi 115 zet a inlan a, captain armband thlengin a hreng nghe nghe. Player ṭha zinga chhiar tel Matt Busby hian football khelh a chawlhsan hnuin Reds hmelma Man United a enkawl a, Premier League-ah vawi nga champion puiin FA Cup nomawi vawi hnih a chawi a, European Cup-ah a champion pui bawk. Scottish manager hian United-a record a neih ṭhat vangin knighthood pek a ni a, United siam liantu pawimawh hi Liverpool captain hlui a ni.

Busby hian Liverpool ṭantu ruhkawl Kop chet dan erawh United-a manager hna kum 11 a thawh hnuah pawh a fak tho a, kum 1957 khan, "Liverpool jersey sen ha tawh chauhin goal khung tura nawr laia Kop supporter-te hlutna an hrethiam pha ang," tiin a ziak. Amaherawhchu Busby hian Manchester United a zawm avangin Liverpool board an lung ni lo a, club-in a farewell exhibition game an buatsaihah pawh a tel ve phalsak a ni lo.

Ngaihtuah tel theih tak chu Liverpool manager George Kay kha Don Welsh ni loin Busby-a'n thlak zawk se kum 1959 khan Bill Shankly tan Reds-ah manager hna ruak a awm kher lo ang. Chuvangin Busby-a'n United a zawm hi Liverpool tan lawmna a ni thei a, an club history-a manager ropui bera chhal ngam Shankly an neih theihna chhan pakhat a ni.

November 1959 khan Shankly hi Huddersfield Town a enkawl laiin inkhelh banah Liverpool chairman Tom Williams leh director Harry Latham-te'n an dawr a, Reds hruaitute chuan, "Kan ram chhunga club ṭha ber enkawl i duh em?" tiin an zawt a, Scottish manager chuan, "Matt Busby a bang dawn em ni?" tiin hriat nuam lo takin chhang mah se ni rei lote hnuah Liverpool manager a nih thu puan a ni.

Shankly hian a thu thiamna leh result hmangin Kop-te rilru a hneh a, Reds hi First Division-ah vawi thum champion puiin FA Cup-ah vawi hnih a champion pui a, UEFA Cup-ah a champion pui bawk.

Liverpool leh Manchester United inhalna tilang chiangtu leh chu September 2002-a Sir Alex Ferguson-a ṭawngkam kha a ni awm e. Liverpool hian 1990-ah league title 18-na an la a, kum thum hnuah Fergie-a'n United chu Premier League title hmasa ber lak pui mah se Red Devils hian an hmelma hi nomawi chawi kawngah an pha lo hle.

Kum 2002-ah Arsenal an champion a, 2002-03 season an khel ṭan chauh tihin United-in Arsenal hi point ruk laiin an pha tawh lo. Football expert lar Alan Hansen chuan, "Chona i hmachhawn tawha hau tak ber a ni em?" tiin Ferguson a zawt a, United manager chuan rang fahranin, "Ka tana chona lian ber chu Liverpool hi an awmna ler aṭanga pet thlak a ni. I duh chuan in ziak lang dawn nia," tiin rum takin a chhang a, Arsenal chu Liverpool nena khaikhin tlakah a ruat lo.

Scottish manager Alex hian 2008-09 season-ah Liverpool record nih rualin United chu league-ah a vawi 18 nan a champion pui a, 2010-11 season-ah United-in Reds record an khum a, 2012-13 season zawha Ferguson-a'n manager hna a chawlhsan meuh chuan United hi league-ah vawi 20 an champion hial.

Liverpool erawh hun rei tak chhung vawi 18-naah an tang reng a, amaherawhchu season liam ta khan Jurgen Klopp-a hoin Premier League nomawi an chawi ta. Reds hian English inelna sang berah vawi 19 an champion tawh a, Klopp-a hoin Manchester United hi an awmna ler aṭanga paih thlak an châk et et.

Klopp-a kaihhruai Liverpool hi team namai lo tak an ni a, football khelh phung dan nghet neiin player ṭha seng lut bawk mah se club academy an chhawr ṭangkai tel. Reds-in German manager hoin kawng dik an zawh mek a, amaherawhchu Premier League hi Liverpool leh Manchester United inelna chauh a ni lo. 

Manchester City, Chelsea, Tottenham Hotspur, Arsenal leh Leicester City te an awm ve avangin club pahnih hi nomawi chawi loin an awm rih thei a, United phei chuan Sir Alex Ferguson-a chhuah hnuah nomawi an chawi leh tawh lo.

Liverpool manager Jurgen Klopp-a'n training-ah 11 v 11 an tih tam tur thu a sawi. Chumi awmzia chu United hmachhawn tur Liverpool player 11-ten an reserve team an hmachhawn dawn tihna a ni. Reserve team hi United khelh dan tur angin an inrem dawn tihna a ni a, inpuahchahna ṭha tak a ni thei ang. 

Chutihrualin zawhna hriat châkawm ber mai chu tu nge Liverpool tlarhnungah ding ang tih hi a ni. Mualsira awm Andrew Robertson leh Trent Alexander-Arnold te chu khawih chet chi rual an ni lo a, chutihrualin Southampton nen an inkhelh ṭuma Fabinho leh Jordan Henderson te inkawp ngawt kha chu a fuh tawk lo deuh.

Captain Hendo hian midfield khaikhawm ṭha viau mah se Saints lakah defender a nih lohna a lang leh zeuh ṭhin. St Mary's Stadium-ah Reds-in vawi 17 zet goal attempt an nei a, goal zawnah vawi khat chiah a kal. Statistics thlirin an khelh dan hi Jurgen Klopp-a naute tiha mawi lo a ni a, Mohamed Salah, Roberto Firmino leh Sadio Mane awmna team hian goal zawnah hei aia tam chu pet thei tur an ni.

Reds hian FA Cup-ah Aston Villa youth team an tum a, defence laiah Fabinho leh Rhys Williams te an awm a, captain Hendo chu midfield-ah a awm thung. Klopp-a'n defence laia Fabinho kawppui turin Rhys Williams leh Nathaniel Phillips te a thlang a nih chuan midfield-ah Hendo leh Thiago Alcantara te an awm thei ang a, Spanish midfielder hian tlarhma a pui leh thei zual ang. 

Jurgen Klopp-a enkawl an nih bakah Anfield-a khel tur an nih avangin Liverpool an huai zawk dawn a, 'gegenpressing' hmangin United an nawr tawm a rinawm. An dam kim hun lai anga 'Heavy Metal Football' kan hmu lo a nih pawhin mikhual team hi fimkhur tur zawk chu an ni.

Man United-in chawlhna hun an nei tlem zawk a, Liverpool an hah dam laiin Burnley an hmachhawn. Amaherawhchu Solskjaer-a'n squad chhah ṭha tak a nei a, player duh thlan turah a buai zawk a ang. Tun hnaia United fixtures pawimawh ber chu League Cup-a Manchester City nena an inkhelh ṭum kha a ni a, midfield-ah Scott Mc Tominay leh Fred an inkawp. 

Tominay leh Fred te hi thawkrim mah se ball pek chhuah an harsat a, hei vang hian Solskjaer-a tan player thlan a harsat phah dawn. Burnley nen an inkhelh ṭumin Pogba leh Nemanja Matic te an inkawp rem a, mual sirah Marcus Rashford leh Anthony Martial te an awm a, tlarhmaah Edinson Cavani a rawn awm leh ta bawk.

Liverpool hi counter attack hmanga nawr an duh a nih chuan Rashford a pawimawh dawn a, Martial aiah player tlan chak Daniel James a rawn awm daih a nih pawhin thilmak lutuk a ni hran lo. 

Bench aṭanga lut turin Mason Greenwood leh Donny van Beek te an awm a, tawnhriat nei ṭha Juan Mata te an awm bawk nen player rem dan tur ringawt pawh a nghahhlelhawm tawh hle.