Anfield-ah MANCHESTER UNITED fiahna

January thla chanve kan chuan kai hnua Premier League hmahruaitu chu Manchester United an ni a, Ole Gunnar Solskjaer-a hote hian January 17, Pathianni zan dar 10:00 hian champion lai Liverpool an hmachhawn dawn. Football chinchang hre pha chin tan en hmaih phal chi a ni lo a, a hmuna entu awm loa an inkhel tur chiah hi 'duhthusam' a nih phak lohna a ni.

Manchester United hian match hnuhnung 11-ah chak loh an nei lo a, vawi kuaah hnehna an chan bawk avangin league hmahruaitu an ni mek. Ole-a hote hian an phur vanglai takin league match vawi thum chhung chak hmel hmu tawh lo Jurgen Klopp-a hote an tlawh ang.

Season liam ta khan Liverpool-in Premier League-ah a a vawi khat nan nomawi an chawi a, Klopp-a hote hemi hma season-ah Champions League nomawi an chawi bawk avangin Europe club ṭha ber zingah chhiar tel an ni. 

Reds-in Championship champion Leeds, sum hmang tam Chelsea leh sulhnu nei ṭha Arsenal te hnehin bul an ṭan a, match thum lekah champion rinkai an ni lehnghal. 

Amaherawhchu thilmak a thleng a, Klopp-a hote hi Premier League-a inhamtang hram hram Aston Villa-in 7-2 in an sawp a, Merseyside derby-ah an hmelma Everton nen 1-1 in an inhnehtawk zui. 

Goodison Park-ah Reds-in point hnih aia hlu an hloh a, tlarhnung kulhpui Virgil van Dijk khup a hliam. Dutch defender ṭha mi hi tun season-ah a rawn let hman kher a rinawm loh.

Liverpool-in Van Dijk tel lo pawhin champion turin an ṭha tawk tih khelmualah an pholang a, goal hmaah Wolves aṭanga an lakluh Diogo Jota a hmui bawk nen Reds ṭantute rilru thawi damin a awm. Amaherawhchu vanduainain Liverpool chungah thla a zar a, player inhliam an awm chho ta zut.

VVD bakah tlarhnunga ding chi Joe Gomez leh Joel Matip te an inhliam a, Reds inchhuanna an tlarhnung chu an chak lohna lai a ni ta. Covid-19 vangin inkhelh tur a tam a, harsatna belhchhah turin Diogo Jota, Naby Keita leh Konstantinos Tsimikas te inhliam chuan hna a tih awlsam phah lo.

Amaherawhchu Liverpool hian Premier League top scorer ni lai Mohammed Salah an kawl a, Egyptian foward ang thoa ṭha Sadio Mane leh Reds game ti famkimtu Roberto Firmino te an awm avangin inhliam vanga buaina karah Jurgen Klopp-a hote hi table chung lamah an awm ngar ngar. Liverpool dam kim lo hi Man United phur vanglai aiin an buk a rit a mah a, hei hian Klopp-a hote ṭhatzia a nemnghet.

Nikum January 19 khan Anfield-ah Man United an lenglut a, Liverpool-in Virgil van Dijk leh Mohamed Salah te goal hmangin 2-0 in an hneh. KIopp-a hote an hmelma an hneh zawhah nomawi an hnaih sawt a, Ole Gunnar Solskjaer leh Man United hmalam erawh a chiang lo. Liverpool legend Jamie Carragher chuan Ole hi a sulhnu thlirin rin a har a tih thu a sawi.

Hetihlai hian Roy Keane erawhin a khelhpui ṭhin Norwegian manager hi a ṭan tlat. United captain hlui Keane chuan, "Hun pe rawh se, kum khat dang tal chu a phu a ni," tiin a ṭan ve tlat thung. Football pundit zingah Keane thlawp lotu an tam a, nikum December thleng pawhin United ṭantu zingah Ole ban duhtu an tam.

Amaherawhchu thla khat chhung lekin Man United dinhmun a danglam a, Sir Alex Ferguson-a chhuah hnua a vawi kha nan January thlaah hma an hruai. Table-a an dinhmun thlirin champion rinkai zingah Man United hmaih a thiang lo. 

Chutihrualin tun season danglam takah hian Tottenham leh Chelsea te pawhin hma an hruai tawh tih hriat a ṭha a, Man United hlim chhung pawh hi Pathianni zana tawp theih reng a ni.

Ole Gunnar Solskjaer chuan, "Kan duhthusam hmunah kan awm mek. Chutihrualin champion lai kan tlawh dawn a, season thum leh a chanve chhung chu ṭha takin an khel tawh. A harsa dawn tih kan hria a, amaherawhchu hmachhawn turin kan inpeih. 

"Liverpool hmachhawn hunah tun aia ṭha hi a awm lo a, kan inringtawk a, chakna duhin kan ril ṭam. Kan rilru put hmang fiahna a ni ang," tiin Anfield chu Manchester United tana fiahna a nih tur thu a sawi.