MVP-ah kum 15 mi Sooryavanshi

Indian Premier League-a most valuable player atan kum 15 mi Vaibhav Sooryavanshi thlan a ni a, player ṭha bera thlan a nih avang hian Tata Sierra dawng mah se a lawmman dawng khalh tur chuan kum thum la nghah a ngai.

Sooryavanshi hi kumin IPL-ah naupang ber ni mah se khelmualah erawh a kawlhrawng a, innings 16-ah run 776 siamin a strike rate pawh 237.30 a tling pha hial. A club khelhna Rajasthan Royals-in final thleng pha lo mah se tun inelnaa run siam tam ber a ni a, eliminator round leh qualifier 2-ah run 97 leh 96 a siam.

Chawimawina a dawn zawhah Sooryavanshi chuan, "Kan tan chuan hun hlu bik a ni a, ka ngai hlu hle. Season tharah tun aia che ṭhat ka tum ang," tiin a sawi. Tun season-a mimal chawimawina leh match fee aṭangin Tata Sierra bakah nuai 250 vel a dawng.

MVP a nih avangin Sooryavanshi hian nuai 15 a dawng a; Orange Cap, Super striker of the season, super sixes of the season leh emerging player of the season a dawn avagnin nuai 10 ṭheuh a dawng.

Rajasthan Royals tana a contract a ziah leh avangin nuai 100.10 a dawng a, a inlanna match apiangah nuai 7.5 a dawng. Royals tan match 16 a khelh avangin match fee aṭang ringawtin nuai 120 a dawng. A dawn zawng zawng belh khawm hian tun season IPL aṭangin nuai 250 a la pha daih. Chutihrualin a kum a la naupan avangin hmabak a nei êng a, hliamin a tlakbuak a nih ngawt loh chuan Sooryavanshi sum lakluh hi a la phung chho dawn chauh.