Goa hmaaah Jamshedpur an zawr

Indian Super League inkhelah FC Goa chuan 3-0 ngawtin Jamshedpur FC an sawp a, Jorge Ortiz Mendoza chuan goal hnih khungin Ivan Gonzalez chuan goal khat a khung bawk. 

Jamshedpur midfielder Alexandre Lima chu yellow card pahnih a hmuh avangin hnawhchhuah a ni a, hei hi chak loh chhuanlama hman erawh a rem lo.

Brazilian midfielder hi minute 85-naah hnawhchhuah a ni a, hnawhchhuah a nih hma hian Goa-in goal hnih an khung hman - goal thumna erawh minute 89-naa lut a ni thung. 

Jamshedpur tan Isaac Vanmalsawma chuan minute 11-naah goal khungna remchang nei mah se Goa keeper Mohammad Nawaz chuan ṭha zetin a dansak a, minute 57-naa luhtir

William Lalnunfela goal khung tur nia lang chu Goa defender James Donachie chuan goal line aṭangin a lo tauh chhuak bawk. 

Ricky Lallawmawma chuan Jamshedpur tan inkhel bul a ṭan bawk a, Laldinliana Renthlei erawh Bengaluru nen an inkhelh ṭuma a hliam avangin a la inlan thei lo. 

Armed Veng South tlangval chuan, "Tun thla tawp lamah chuan inkhelh leh theih tawh ka inbeisei," tiin Vanglaini a hrilh a, dam lam a pan mek.