Barca leh Atletico ten Silva dawr

Spanish champion Barcelona chuan Anthony Gordon an lakluh hnuah duhtawk mai an tum lo a, Manchester City chhuahsantu captain Bernardo Silva chu Camp Nou lama sengluh tumin an dawr mek.

Mahse, Barcelona tan Silva hi awlsam taka lakluh theih a ni dawn lo. Atletico Madrid pawhin Portuguese midfielder hi an dawr ve bawk a, he thu buatsaih a nih lai hian thutlukna a la siam lo.

Barca hian Silva hi an duhna a rei tawh. Mahse, Newcastle United aṭanga Anthony Gordon lakluh leh, Atletico Madrid striker Julian Alvarez thlem luh chu ngaih pawimawh hmasakah an nei.

Hetiang boruak karah Atletico an lo lang a, Diego Simeone-a team hian Barca aiin Silva hi hlawh pek hnem an inhuam zawk nia sawi a ni a, khelmual pawn lam thlengin club pahnih hi an inel zak zak dawn niin a lang.

Tun hnaiah Barca hian euro maktaduai 100-a Alvarez lakluh an tum dawn nia sawi a awm a, hei hi Atletico chuan tihelin, an club social media lamah AI hmanga siam chawpin, Lamine Yamal, Pedri leh Raphinha te an la lut angin an tarlang.

Atletico hian, "I thil hmuh zawng zawng awih vek suh, a bik takin Barca nena inzawmna nei a nih chuan," tiin Alvarez chungchanga transfer thulengah Barca an kap a, boruak a lian hle.

Kum 31 mi Silva hian City-ah a contract hmang zoin, Premier League nomawi paruk bakah FA Cup (2), Carabao Cup (5) leh Champions League nomawite a chawipui a, FA Community Shield leh FIFA Club World Cup a lakpui bawk.