Kum 19 mi Fonseca a vul

Tennis khawvela inelna ngaihhlut hlawh tak French Open-ah lal thar a piang mek - a hming chu Joao Fonseca a ni a, quarterfinal lut turin tennis player langsar Casper Ruud chu 7-5 7-6 (10-8) 5-7 6-2 in a hneh leh ta.

Kum 19 mi lek Fonseca hian third round-ah tennis khawvela hming langsar tak, mi tam takin tennis khawvela player ropui ber ang hiala an chhal Novak Djokovic chu a lo hneh tawh a, tunah Casper Ruud a hneh leh ngat. Ruud hian French Open-ah hian final vawi hnih a lo lut tawh.

Fonseca chuan, "Court-ah hian ka nihna anga khelhchhuah mai ka tum ṭhin a, hlim taka he inelna hmachhawn hi ka tum chu a ni mai. Shot ṭha tak neih a, point hlawhchhuah a, inkhel hmuhnawm tak chhawpchhuah ka tum ṭhin.

"Ka tan chuan tawnhriat thar zel a ni a, Grand Slam tournament-a kar hnih cham chu a awl ai lo hle. Mahse, ka theihna zawng zawng ka hlan a, chutianga tichung zel chuan, kan hmabak match zel kan thlir ang," a ti a, thui tak lo suangtuah lawk a ṭul loh thu a sawi.

Fonseca hian zanin dar 11:45-ah French Cup quarterfinal hi a khel nghal dawn a, amah ang thoa kum naupang, kum 20 mi Jakub Mensik nen an intawng ang.

Mensik pawh hian quarterfinal lut tur hian star lar tho Andrey Rublev a hneh a, fourth round inkhel hmuhnawm takah 6-3 7-6 (8-6) 4-6 2-6 6-3 in a hneh.

World number three Alexander Zverev chuan vawiin tlaiah quarterfinal khelin, dar 5:30-ah kum 19 mi Rafael Jodar a hmachhawn dawn - Spanish tennis player beiseiawm Jodar hian a hnampui pa Pablo Carreno Busta chu 4-6 4-6 6-1 6-2 6-2 in a hneh.

Zverev hian quarterfinal lut tur hian Dutch player Jesper de Jong chu straight set-in, 7-6 (7-3) 6-4 6-1 in a hneh a, kum 29 mi tennis star tan a Grand Slam title hmasa ber hlawhchhuahna remchang a inhawng mek.