Chandigarh lakah Mizoram chak lo

Board of Control for Cricket in India hnuaia inelna Syed Mushtaq Ali Trophy khelh laiah nimin khan Mizoram team an inlan a, an khingpui Chandigarh chu run 89 in an ngam lo.

Sri Ramachandra Medical College, Chennai a inelna neihah ṭhum vawra vannei zawk Chandigarh lamin vuak hmasak an thlang. Over 20 chhunga run 200 siamin mi pathum chauh an inhloh.

Mizoram tan Meghalaya laka wicket hnih latu Lalnunkima Varte chuan wicket khat a la leh a, Chandigarh tan captain Manan Vohra chuan ball 44 a hmachhawn aṭanga run 85 siamin a thawh hlawk hle.

Mizoram bat hun a thleng a, Mizo player ten hma an sawn tih a lang. K Lalremruata (27 runs), Lalchhuanliana (17) leh Lalhmangaiha (16) ten run an siam chhuak nual a, mahse an tum ram erawh an thleng zo lo.

Chandigarh lam target siam (201 runs) chu a sang mah mah a, over 20 chhungin run 111 chauh an siam chhuak - wicket ruk an hloh thung. Mizoram hian match thum an khelh tawh chinah chak ni hmel an la hmu lo a ni.

Mizoram hi plate group-ah Sikkim, Meghalaya, Chandigarh, Nagaland, Manipur, Arunachal Pradesh leh Bihar te nen an awm khawm. Group khata awmte hi an inkhelh kual hnuah a sang pahnihin knockout round an lut dawn.

January 17, Pathianni hian Nagaland an hmachhawn leh dawn a, chumi hnuah Bihar an la hmachhawn leh ang.