Suarez tel loin Uruguay an khel dawn

Kumin World Cup atan Uruguay chuan May 31, Pathianni zan khan squad an puang a, Uruguay legend-a chhal ngam Luis Suarez a hming a lang ve lo a, Suarez hian tun hnaiah an ram tan inlan leh a hreh loh thu sawi mah se koh a ni lo a, inkhelh a chawlhsan hmain Uruguay jersey nen a hmel kan hmuh a rinawm tawh loh.

Kum 2024, September khan Liverpool forward hlui hian Paraguay nen World Cup qualifying match an khelh zawh hnuah ram tan inkhelh a chawlhsan thu a puang tawh a, hemi hnu hian an ram kawr hain a inlan leh tawh lo.

Mahse tun hnai World Cup boruak inmung chhoin Suarez-a lung a len thar a, an ramin an mamawh a, kohna a dawng a nih chuan World Cup-ah ram tan inlan leh a hreh loh thu a sawi.

Suarez hian tun season Major League Soccer-ah match 11 aṭangin goal ruk a khung tawh a, danglamna siam turin a la ṭha tawk. Mahse Uruguay coach Marcelo Bielsa-a'n player 26 a koh zingah Suarez a ko tel ta chuang lo.

Kum 39 a nih ve tawh avangin Suarez tan a international career chu a tawp chiangah a ngaih theih tawh a, a tel loin World Cup champion hmasa ber an inlan tawh dawn.

Barcelona tan pawha khel tawh Suarez awm dawn lo mah se, Uruguay-in player langsar an kawl nual a, tlarhma lamah Liverpool forward hlui tho Darwin Nunez chu an innghahna a ni ang. Nunez hian season hman zawh takah khan Saudi Pro League-ah Al Hilal tan goal ruk khungin assist pali a nei.

Keeper-ah tawnhriat ngah Fernando Muslera a la awm a, Barca defender Ronald Araujo, Atletico Madrid centre back Jose Maria Gimenez leh Napoli defender Mathias Olivera bakah, Manchester United tan pawha khel tawh Guillermo Varela te an nei.

Midfield-ah Real Madrid player pawimawh Federico Valverde-a'n Premier League aṭangin Manuel Ugarte leh Rodrigo Bentancur te an la nei bawk a, champion tura rinkai ni lo mah se zuam chi an ni dawn lo. Uruguay hi Group H-ah Saudi Arabia, Cape Verde leh Spain nen an awm ho a, June 16-ah Saudi Arabia nen an match hmasa ber an khel ang.