World Cup-ah a vawi ruk nan Ochoa

Mexico chuan May 31, Pathianni zan khan World Cup squad an puang a, Guillermo Ochoa chu koh zingah a tel a, Cristiano Ronaldo leh Lionel Messi te huangah awmin a vawi ruk nan World Cup a khel dawn.

Kum 40 mi Ochoa hian 2006 World Cup-ah khan World Cup khel ṭanin, 2010, 2014, 2018 leh 2022-ah khan Mexico tan rinrawl a ni. Ochoa hi Cyprus club AEL Limassol tan a la khel a, Mexico tan a thiam thil lantir leh a tum dawn.

Mexico hian player langsar an kawl tam lo a, Fulham forward Raul Jimenez chu an innghahna a ni dawn. Jimenez bakah West Ham midfielder Edson Alvarez leh Atletico Madrid midfielder Obed Vargas te chu an player langsar zual an ni.

World Cup thleng tur zinga mi an nih avangin, Mexico hian hma taka tlak an duh dawn lo a, chutiang a thlen lohna tur chuan an player te bakah anmahni ṭantute puihna an mamawh ang.

Mexico hi Group A-ah South Korea, South Africa leh Czech Republic te nen an awm ho a, June 12 zanah South Africa nen an match hmasa ber an khel dawn. World Cup atan inbuatsaih mekin an friendly match hnuhnung ber atan June 5, Zirtawpni hian Serbia nen an inhmachhawn ang.