Senegal hnehtu USA an inpeih

World Cup thleng tur zinga mi USA chuan Pathianni zan khan, Senegal nen inpuahchah nan friendly match an khel a, USA hian 3-2 in an chak a, World Cup-ah an tawh a khirh dawn tih an lantir.

Bank of America Stadium, Charlotte-a inkhelah friendly match ni mah se stadium chhungah mipui an khat a, entu an ṭhahnem hle. USA-in an goal khung nan hun an mamawh rei lo a, minute rukna lekah Antonee Robinson, Ricardo Pepi leh Christian Pulisic ten mawi taka Senegal tlarhnung an ṭhiah hnuah Sergino Dest-a'n hnai tak aṭangin a khung a, USA-in hma an hruai.

USA an khel a nung chhunzawm a, minute 19-naah Pepi-a ball pek um luttu Pulisic chuan Senegal keeper Mory Diaw a bun hnuah goal ruakah a khung a, an hmahruaina a belhchhah. AC Milan forward Pulisic goal hi thla nga hnua club leh ram tan a goal hmasa ber a ni.

Senegal an bet reng bik lo a, minute 43-naah an captain Sadio Mane chuan goal kilah pet lutin an siphurh a sut ṭhen a, Mane hian second half minute rukna lekah USA defender te tihsual aṭangin, goal ruakah khung lehin an siphurh a sut zo. Liverpool forward hlui hi World Cup-ah an ram tan innghahna a ni leh dawn.

An ram leilunga khel USA-in chak ngei an duh a, goal khung belh tumin an nawr. Minute 62-naah Timothy Weah cross chu Senegal defender Moustapha Mbow-a'n a dang per zo lo a, Monaco striker Folarin Balogun-a'n 'cool' takin a pet goal a, an chakna goal a ni zui.

Mimala langsar ngah lo mah se USA-in Europe-a club lara khel thei an ngah a, tlarhmaah Pulisic leh Balogun bakah Pepi a khel ṭha a, Fulham hel lai Pepi hian goal khung lo mah se assist a neih bakah a teammate te tan hmun awl a siamsak thiam hle

Tlarhmate thlawp turin Juventus midfielder Weston McKennie, Bournemouth midfield innghahna Tyler Adams leh Borussia Mönchengladbach midfielder Giovanni Reyna te an nei a, an player te hi tha za rual an nih hlawm an nih bakah, a thlengtu an nih dawn a, Mauricio Pochettino-a'n a enkawl dawn bawk avangin World Cup-ah an tawh a khirh dawn.

Hetihlai hian Senegal pawh an duai bik lo a, Mane bakah Crystal Palace forward Ismaila Sarr, Nicolas Jackson leh Everton forward Iliman Ndiaye te an nei a, midfield luahlum turin Premier League player pathum Idrissa Gueye, Habib Diarra leh Pape Mata Sarr te an awm a, AFCON hnuhnung bera khel ṭha tak Pape Gueye an la nei cheu.

Defence-ah pawh Europe club langsara khel an ngah bakah, Chelsea keeper hlui Edouard Mendy-a'n si ban a nghah dawn avangin ram lian zawk lakah an zam dawn bik lo.