Crystal Palace leh Sage ten inbiakna nei

English club Crystal Palace chuan an manager thar atan, RC Lens aṭangin Pierre Sage an duh a, Sage leh Palace hian inbiakna pawh kalpui tawhin French manager hi palace manager thar tura rinkai ber a ni.

Eagles hi FA Cup, Community Shield leh Conference League champion puitu Oliver Glasner-a'n January khan a chhuahsan dawn tih a sawi chiang tawh a, kar hmasa lawk khan Conference League-ah champion mah se Glasner-a'n a thutlukna sut a tum lo.

Glasner thlakna turin Eagles hian Bournemouth coach Andoni Iraola an duh a, mahse Iraola hi Liverpool-in Arne Slot thlak nan an duh a, indawrna an kalpui nghal avangin Palace-in Sage lam an hawi.

French manager Sage hian tun season hman zawh takah khan beisei phâk baka ṭhain Lens a kaihhruai a, Ligue 1-ah pahnihna nihpuiin Paris St-Germain an el pha hial a, season tharah Champions League an khel dawn. Hei bakah hian an club chanchina a vawi khat nan French Cup-ah a champion pui bawk a, Palace-in an hmu tai hle.

Palace hian Sage hma hian Coventry coach Frank Lampard, Ipswich manager Kieran McKenna, Tottenham Hotspur boss hlui Thomas Frank leh Nottingham Forest-in an ban tak Sean Dyche te chu an ngaihvem zingah an tel a, mahse manager te dinhmun ngaihtuahin Palace tan Selhurst Park-a sawm luh mai theih an ni lo a, chuvangin Sage nen inbiakna an nei ta a ni.