Spanish Super Cup Real an tlawm; final-ah Barca vs Bilbao

Spanish football ngainatuten Spanish Super Cup-a El Clasico hmuh an beiseina chu a thamral a, Athletic Bilbao chuan final lut turin Real Madrid chu 2-1 in an hneh. 

Athletic Bilbao hian minute 38 chhungin Raul Garcia hmangin goal hnih an khung a, Real tan Karim Benzema chuan khung ve mah se minute 73-na a nih tawh avangin an 'comeback' thei lo. 

Barcelona chuan Nilaini zan khan penalty-ah Real Sociedad chu 3-2 a hnehin final an lo lut tawh a, Real aia Athletic Bilbao an hmachhawn theih dawn avangin an thaw huai ang. 

Spanish Super Cup final hi Pathianni zan dar 1:30-ah khelh nghal a ni dawn a, kartawp La Liga inkhel awm dawn lo mah se Pathianni zan inkhel tur avang hian Spanish football boruak a 'hot' hle. 

Team pahnih squad leh tawnhriat enin Real Madrid chu Bilbao laka chak tura beisei an ni a, final-ah El Clasico khelh ni se Spanish Super Cup-a 'hot' lehzual ang tih a chiang bawk. 

Mahse, Athletic Bilbao lamin ngaihdan dang an lo nei a, Real Madrid chu awlsam taka final luhtir mai an tum bik lo - minute 18-na lekah Raul Garcia chuan a through ball hmuh chu goal-ah a chantir a, Real an hawihai. 

Athletic Bilbao an phur laklawh a, goal khung tawpsan mai an tum lo. Real right back Lucas Vazquez chuan Athletic centre back Inigo Martinez a ti tlu a, penalty a chawi. 

Goal hmahruai khungtu Garcia a lo pen chhuak a, Spansih forward hian inringtawk takin goal-ah a chantir - Real an talbuai a, goal dang lut loin chawlhlawk hman a ni. 

Real-in minute 90 chhung inkhel an thunun a, 71% zet ball an chang thei - mahse, football-a pawimawh ber goal an khung lawk thei lo a, Bilbao-in first half-ah goal hnih an khung thung!

Hun tawp nan minute 17 chauh a awm tawh tihah harsatna aṭanga Real khai chhuak ṭhintu Benzema a lo lang a, French striker hian si phurh a rawn sut ṭhen. 

Benzema goal hi offside vangin pawm a ni lo zet a, mahse, video assistant referee (VAR) hmanga ennawn a nih hnuah pawm a ni - Real beiseina a vul thar a, final luh ngei an tum. 

Mahse, Real harh a tlai hret - si phurh an sutin minute 17 chiah khelh tur a awm tawh a, Benzema-a'n goal dang khung leh mah se offside vang bawkin pawmsak a ni lo. Hun a tawp zui a, 2-1 in Bilbao-in hnehna an chang. 

Barcelona-in Spanish Super Cup final an luh laiin Real Madrid-in final an lut thei lo a, sawiselna a ri ring leh dawn tih chu thil chiang sa a ni - mahse, Real boss Zinedine Zidane chuan final luh loh chu an tan hlawhchhamna a nih loh thu a sawi. 

French coach chuan, "Hlawhchhamna a ni lo - hlawhchhamna chu theihtawp kan chhuah loh a, kan tum tawk loha thil thleng ṭhin hi a ni. Mahse, zaninah chuan kan theihna zawng zawngin kan bei.

"Hringnun chu hetiang hi a ni tlat. Engtiklai pawhin hnehtu zawkah a ṭan reng theih loh a, mahse, kan khelh leh tur aṭang chuan hnehna changtu zawk nih kan tum ang," a ti. 

Real tan Eden Hazard-a'n bul ṭan mah se beisei a la phak lo tluang zel a, Zidane chuan a player hi chhanin, "A pawimawh ber chu inrintawkna a neih let leh hi a ni - a theihna kan hrechiang a, kan nghah hram hram a ngai," a ti - Hazard hian Real a pan hnuah match 32 khel tawhin goal thum chiah a la khung a, assist vawi sarih chiah a la nei. Pound maktaduai 150 man player khelh dan atan chuan a ropui tawk lo. 

Pathianni zanah Spanish Super Cup final khelh a ni dawn a, Barca chu champion tura rinkai zawk an ni leh dawn - mahse, Athletic Bilbao hi rin hlawh zawk Real Madrid hneh chunga final lut an nih avangin an zam lo ang. 

Barca leh Bilbao hi Spanish Super Cup-ah hian vawi li an lo intawng tawh a, heng zinga vawi thumah hian Barca an chak vek - an intawn hnuhnung ber 2015 erawh Barca-in sawi nuam an ti lo ang. 

Spanish Super Cup final double leg-a an khelh lai a ni a, first leg-ah Bilbao legend Aritz Aduriz chuan hattrick siamin Barca hi 4-0 in an sawp a, second leg-ah pawh Aduriz bawkin goal khung lehin 1-1 in an inhnehtawk - inkhel pahnih belhkhawmah Bilbao hi 5-1 in an chak. 

Barca hian kum 2021 chuan kai hnuah chak loh an la nei lo a, kar hmasa lawk khan league match-ah Bilbao hi 3-2 in an hneh bawk - Pathianni zanah pawh hnehna chan leh ngei beiseiin an inlan ang.