Hmalam pan a ngai - Flick

Bayern Munich manager Hansi Flick chuan tun hnaia an result ṭha lo chu kalsan a duh a, season hmasa lama hun duhawm an hman ang khan ṭha taka chak chhoh leh a duh tawh thu a sawi.

German champion hian Bundesliga an khelh hnuhnung berah Borussia Monchengladbach an ngam lo, tun hnai maiah second division club Holstein Kiel hneh loin German Cup aṭangin an tla bawk.

Flick chuan, "Tuna kan boruak ang hi tawn reng ka duh lo, kei chuan hmalam pan zel ka duh. Team pumpui hian hma lam pana ke kan pen leh tawh a ngai a ni, cup inelna aṭanga kan tla ngawt te kha pawm thiam a harsa.

"Hri leng vangin thil chi hrang hrang a thleng a, match inkarah chawlh a tam lo hle - season pawhsei a nih pawh a rinawm loh. Chuvangin player zawng zawng inkhel thei se tih hi ka duhthusam a ni bawk," a ti.

Bayern hian Pathianni zan dar 8:00 hian Allianz Arena-ah Freiburg an mikhual zui dawn a, chak ngei an tum ang. An chak lo a nih chuan an hnuaia awm RB Leipzig tan tlan pelh theih an ni tawh dawn.