United leh Mourinho thawm a ring

Jose Mourinho-a'n Manchester United nuam a tih avangin a contract neih lai kum thum aia rei cham a duh a, Premier League-a paruknaa awm mek club hian January transfer atan thawm an nei lian viau bawk.

'The Happy One'

Kum 53-a upa Mourinho hian July thla khan Manchester United a zawm a, beisei ang result la nei lo mah se manager sulhnu nei ṭha a nih avangin duh ni se sum tamna China pan turin sawmna a hmu.

Portuguese coach Jose Mourin-ho chuan, "Engtik niah emaw contract thar min rawn zawrh se, ka ziak nghal ang. China aṭanga sum an thehchhuah phal zat hi a itawm tham a, amaherawhchu ka kum a la naupang a, China-a kal turin hun ka la ngah. Tunah chuan sum tamna ai chuan inelna sang bera tel hi ka duh a ni," tiin China pawisa chu mi zawng zawng tana itawm tham a nih thu a sawi rualin hnar thei dinhmuna a la din thu a sawi tel bawk.

January transfer

United manager Mourinho chuan, "Tuna ka player neihte hi la kawl theih a nih chuan ka lawm tawk khawp ang. Tunah pawh ka player ṭhenkhat khelhna hun ka pek tam tawk theih loh avangin pawi ka ti a, tlang taka sawi chuan Ashley Young leh Memphis Depay te hi chuan khelhna hun an nei tam tawk lo," tiin Sky Sports in an kawm ṭumin a sawi.

Portuguese manager hian a player kawl lai chhuahtir a duh lo a nih pawhin lakbelh erawh a hreh lo niin a lang a, Benfica defender Victor Lindelof-a'n January thla khian United a zawm dawn niin khawthlang media te chuan an tarlang tawh.

Swede defender Lindelof man hi pound maktaduai 38-42 bawr vel tura ngaih a ni a, United hi a zawm thei a nih chuan defender Rio Ferdinand aiin a to dawn tihna a ni. England international defender hian kum 2002 khan Leeds aṭangin United hi pound maktaduai 29.1 in a zawm.

Kum 22-a upa Lindelof hi feet ruk leh inches hniha sang a ni a, defence laiah a din theih bakah right back-ah a khel thei a. 2015 UEFA European U21 C'ship-ah Lindelof hian Sweden a champion pui a, team of the tournament-ah thlan a ni bawk. Swede defender hian season liam ta hun chanve lamah Benfica-ah khelhna hmun a chang ṭan a, kuminah player pawimawh a ni tawh.

Mourinho-a'n defence laia chhawr turin defender panga Eric Bailly, Daley Blind, Chris Smalling, Marcos Rojo leh Phil Jones te an nei a, amaherawhchu Ivorian defender Bailly hian January thlaa Africa Cup of Nations a khelh dawn avangin Lindelof hi mamawh chuang liam tia sawi theih a ni bik lo.

Portuguese manager hian tlarhma lamah pawh player melh a nei a, chutihrualin mamawh lo chung erawh lak a tum lo. United lak tum zingah Atlético Madrid forward Antoine Griezmann chu sawi tel a ni a, French forward erawh January transfer-a lakluh theih chi niin a lang lo.