Champion theih inring Mane

Liverpool forward Sadio Mane chuan cham-pion tura an ṭhat tawk thu a sawi. Liverpool hian an league match hnuhnung berah injury time-a Mane goal hmangin Everton an hneh a, chak zo lo tur anga an lan hnu pawha hnehna an chang thei chu 'champion zia' a nih thu Mane-a'n a sawi.

Senegalese forward chuan, "Everton laka kan chak dan kha thlirkir ila, khatiang kha champion zia chu a ni. Season tawp lo sawi lawk nan chuan a la hma deuh a ni mai thei a, tuna kan tih theih awmchhun chu keimahni chauh inngaihtuah chunga hmahruaitu Chelsea ngaihtuah buai loh hi a ni a, a sang thei ang ber thlen kan tum ang," a ti.

Liverpool hian Decem-ber 27 zanah Stoke City an mikhual dawn a, December 31 zanah Premier League nomawi an chuhpui Manchester City mikhual chhunzawmin January 2, ruai ṭheh zanah Sunderland an lenchilh thung ang.

Nomawi inchuh boruak san lai taka Reds channa tur erawh Africa Cup of Nations khel turin Mane a zin chhuak dawn a, Senegal chet ṭhat dan a zirin league match-ah Manchester United, Swansea City, Chelsea leh Hull City a hmachhawn thei dawn lo a, FA Cup third round-a Plymouth Argyle leh EFL Cup semi-final a Southampton an hmachhawn hunah a inlan thei lo chiang bawk dawn.

Mane chuan, "Liver-pool-in min mamawh laia zinchhuah chu thil nuam tak a ni lo a, mah se kan ram tana fehchhuah hi ka hnar phal ngang lo a ni. Ka awm loh avangin Reds hi an buai erawh ka ring miah lo. Philippe Coutinho leh Joel Matip te an lo dam tawh ang a, Daniel Stur-ridge a dam tawh bawk," tiin a sawi a, an hmabak êng takin a thlir.