Antonio Conte-a'n a la duhkhawp lo

Premier League hma-hruai-tu Chelsea-in tun season-ah league match 17 khel tawhin goal 11 chiah an la chhuah a, Premier League-a goal chhuah tlem ber an ni mek - hetichung hian 3-4-3 formation hmanga English football thunun mektu Antonio Conte-a'n January bazarah tlarhnung thuam chak a la tum cheu!

Kum 36-a upa John Terry leh kum 32-a upa Branislav Ivanovic te chu season tawpah an chhuah rin a ni a, kum tam tawh defender pahnih thlak tur thlirlawkin Roma defender pahnih Kostas Manolas leh Antonio Rudiger te an ngaihven mek.

Chelsea hian a tirah Juventus defender Leonardo Bonucci beisei mah se Italian defender hian tun hnaiah Turin khaw club a 2021 thleng cham tura contract thar a ziah avangin an beiseina a tawp a, Roma defender pahnih lam hi an hawi leh ta zawk a ni. Serie A-a pahnihna ni mek Roma hian financial fair play regulation zulzuia player lei leh hralh an kalpui a ngaih avangin an defender zinga pakhat zawk tal hi chu an hralh ngei a rinawm.

Blues tan rei tak a inhliam hnuah Kurt Zouma dam leh tawh mah se kum 22-a upa defender hi February thla hnuah a la inlan leh loh avangin Conte-a'n a chhawr lawk a rinawm loh a, Roma defender pahnih bakah Burnley defender pawimawh Michael Keane leh Middlesbrough defender Ben Gibson te hming pawh lamrik a ni.

Antonio Conte chil tiputtu zingah Monaco full-back Djibril Sidibe leh defensive midfielder Tiemoue Bakayoko an tel a, Italian manager hian Blues techincal director Michael Emenalo nen thla hmasa Champions League-a Monaco leh Tottenham inkhelh ṭumin French club player pahnih inkhel hi an lo en tawh.

Chelsea hian December 26 zanah Bournemouth an mikhual dawn a, kumhlui thlah zan December 31-ah Stoke City mikhualin Tottenham Hotspur nen January 4 zanah kum thara an league match hmasa ber an khel bawk ang.