Vardy tel lohna Foxes

Leicester City striker Jamie Vardy-a'n Stoke City laka red card a hmuh avangin league match thum chhung a inlan thei dawn lo a, English striker hian December 26 zana Everton an mikhual hunah te, December 31 zana West Ham an hmachhawn hunah leh January 2 zana Middlesbrough an lenchilh hunah a hmel a lan thei dawn lo. Zawhna awm nghal chu an striker rinrawl awm lo tur hi dinhmun ṭha lo taka awm mek Foxes hian an tuar ang em tih hi a ni.

English striker hian season hmasa Premier League nomawi an chawina kawngah goal 24 a khung a, tun season-ah beisei phak loin vawi 17 inlanah goal nga chiah la khung mah se Manchester City 4-2 a an hneh ṭuma hattrick siam thei a nih avangin a tel loa Krismas an hmachhawn a ngai tur hi Foxes tan chuan channa nasa tak a tling.

Leicester chair-man Vichai Srivaddhana-prabha chuan Jamie Vardy red card hmuh ngaihtuah nawn tura an ngenna Football Association-in an hnawl chu pawm dam har a tih thu sawiin, "Vardy chunga referee thutlukna dik lo avangin ka lawm lo takzet a, FA-in kan dilna a hnawl ngat phei hi chuan Premier League ropuina a ti hmel hem a ni," a ti.

Foxes hi BBC Sports Personality 2016-ah Team of the Year-ah thlan an ni a, Claudio Ranieri chu coach of the year-ah thlan ni bawkin tun dinhmunah chuan season hmasaa an mumang ram ai chuan top 10 chung lama an awm theih dan tur chu thil beiseiawm zawk a ni.