Pochettino-a'n Spurs champion pui a tum

Tottenham Hotspur manager Mauricio Pochettino chuan Premier League champion ni tura beiseina a la thih loh thu a sawi a, Spurs chu league nomawi chawipui ngei a tum.

Spurs hian season hmasaah khan pathumna nichungin Premier League an khar a, tun season-ah league match 17 khel tawhin pangana an ni a, hmahruaitu Chelsea nena an inthlauhna chu point 10 a ni.

Pochettino chuan, "Premier League champion nih hi kan duhthusam chu a ni a, kan tan chuan inelna pawimawh ber a ni. He hmunah hian ka staff leh ka chhungte nen kan vaiin kan hlim em em vek a, fans ngah tak club niin hlawhtlinna tam tak chhar nan he hmun hi ka duh a ni," a ti.

Argentine manager chuan sawi chhunzawmin, "Chelsea, Liverpool leh Manchester City ten hma an sawn vek a, champion hi sawi ang ngawta thil awlsam a ni dawn lo. Mahse, kan team hi ka ringtawk a ni," tiin nomawi chawi theih a inbeisei hle.

Tottenham hian December 28 zanah Southampton an lenchilh dawn a, kumthar ni January 1 zanah Watford lenchilhin January 4 zanah Chelsea an mikhual ang - Pochettino hian champion a tum tak tak a nih chuan London Derby-a Blues nen an inhmachhawn tur hi a pawimawh khawp ang.