Ka Krismas thilpek chu football - Wenger

Arsene Wenger-a'n Premier League kalphung chu hrehawm a ti hran lo a, a tan football chu Krismas thilpek a nih thu a sawi chhuak.

England-ah chuan Europe ram dangte ang lo takin Krismas laiin league an kaltlang pui ṭhin a, chawlh an nei lo. Arsenal hian bo­xing day-ah West Brom an hmachhawn dawn.

Arsenal manager Wenger chuan, "Krismas chu thilpek in hlanna hun a ni a, ka tan chuan football hi midang tana ka thil pek chu a ni," tiin a sawi. French pachal hian kum 20 chhung zet chu English football a chamchilh tawh a, hetih chhung hian hmun danga chawlh an hmanna ṭhin pan chakna a neih chuan loh thu a sawi tel bawk.

Gunners hian league match 17 khelh tawh aṭangin point 34 an hmu tawh a, league table-ah palina an ni mek. Tun season-ah Wenger-a naute hi vawi thum an chak lo tawh a, hmahruaitu Chelsea an phak lohna chu point kua lai a ni tawh.

Kum 67-a upa Wenger chuan, "Kum tluanin chhungkua a awm khawm theih loh a, Krismas hi chu inhmuhkhawm theihna hun ṭha a ni. Miten hun pui hlim taka an hman khawm lai ngeia an game ngainat tak an en theih nana inkhel lo chhawpchhuah sak hi kan tih theih an ni," a ti.

Hetihlai hian Arsenal player pawimawh berte zinga mi ni mek Alexis Sanchez chuan an manager ngaihdan hi a ṭawmpui vek bik lem lo niin a lang. Copa America best player hian London-a chen chu hahchawlhna hun a tam loh thu leh nitina chona thar hmachhawn a ngaih thu a lo sawi ve thung.

Chile international Sanchez chuan, "London hi khawpui nuam tak a ni a, chutihrualin mi cheng an tam vang leh a hmun hi a zau em avangin hahthlakna tam tak a nei ve bawk. Footballer kan nih chuan hun awl kan nei tlem em em a, kan inkhelh hnuah midang kan hmachhawn zui lehnghal a ngai a, kan inkhelh loh karlakah hi chuan chawlh hahdam hram ka duh
ṭhin," tiin a sawi ve thung.

Kum 28-a upa Sanchez hi tun din­hmunah chuan Arsenal goal khung khawl a ni mek. Tlarhma laiah khelhtir ṭhin niin Premier League season kal mekah goal 12 a khung tawh a, a tluk loh awmchhun chu goal 13 khungtu Chelsea striker Diego Costa chiah a ni.