Australian Open lawmman a pung

Nakkum Janaury 16 aṭang hian tennis season-a Grand Slam hmasa ber Australian Open khelh a ni dawn a, hard court tournament-ah hian kum dang zawng aiin lawmman a tam dawn.

Kumin Australian Open-ah khan lawmman atan pound maktaduai 29.4 sem ral a ni a, nakkumah chuan 14% in a pung dawn. Mipa leh hmeichhe champion chuan £2.2m an dawng dawn a ni.

Australian Open-ah hian champion lai Novak Djokovic leh Angelique Kerber te an inlan thei dawn tih a chiang tawh a, hmeichhe nomawi kawltu German nula hi seeded pakhatna a nih dawn laiin Serbian thiampuipa erawh Andy Murray lakah world number 1 nihna a hloh tawh avangin seeded pahnihna a ni thung ang.

Tournament director Craig Tiley chuan, "Player ten sum fai tam zawk an dawn theih nana ruahmanna kan nei thei hi a lawmawm kan ti hle a, hei hian kawng hrang hrangin nghawng ṭha a neih ngei kan beisei," a ti.

Hliam vanga season tawp lama inkhel thei lo Ro-ger Federer, Rafael Nadal leh Serena Williams te chu Australian Open-ah hian an inlan kim theih beisei a ni.