A chung berah Bayern Munich Ancelotti nauten Leipzig an nuai
Bundesliga champion lai Bayern Munich chuan anmahni hnaihtu leh an elpui ber ni mek RB Leipzig chu 3-0 in an hneh a, match 16 khelh aṭanga point 39 hmuin tun hnai kum ruk chung chu a zawna league hmahruaitu ni chungin kum an khar dawn ta.
Nilaini zan khan Allianz Arena-ah Bayern hian kumina an league match hnuhnung ber atan kaithar Leipzig an lo mikhual a, an mikhual lakah ṭhat an chhuah lo. Thiago leh Xabi Alonso te hmanga 2-0 a hma an hruai hnuah Leipzig forward Emil Fosberg chu Philipp Lahm laka a foul avangin hnawhchhuah a ni.
Goal hnih an phurh hnuah Leipzig player hnawhchhuah a nih bawk avangin Bayern tan nuamsa taka chak theihna hun a inhawng. Chawlhlawk hma chiahin Leipzig goalkeeper Peter Gulasci chuan Douglas Costa a tih tluk avangin peanlty a chawi a, striker Robert Lewandowski chuan tun season-a a league goal 12 nan a khung zui bawk.
Kum 28-a upa Lewandowski chiah hi Bundesliga club ni mek laka goal khung vek thei a ni a, goal hmahruai khungtu Thiago-a goal kha Bundesliga chanchina goal 3800-na chiah a ni bawk.
Fak phu Leipzig
Second half-ah Leipzig-in player 10 in an khel a, goal thum an phur tawh bawk. Heti chung hian an zam bik lo. Season kal meka Bundesliga club 18 zinga goal chhuah tlem pathumna hian goal an chhuah zui tawh lo. Keeper Gulasci chuan Poland international Lewandowski goal khung tur
ṭha zetin ṭum hnih a dan sak a, substitute Franck Ribery lakah a chesual duh lo bawk.
Kum 2009-a din chauh an ni a, club dangte nena khaikhin chuan an budget pawh a tlem hle. Mahse, Ralph Hasenhuttl enkawl he club hian football hi sum hmanga thunun vek theih a nih bik loh zia an lantir mek.
Bundesliga-a an season khatnaah hian an match hmasa 15-ah vawi 11 zet hnehna an chang thei a, Bayern an hneh loh hi an vawi hnih chak lohna chiah a ni. League table-a pahnihna an nih theihna kawngah hian season hmasaa pahnihna Borussia Dortmund pawh an hneh thei.
Eng nge an sawi?
Bayern Munich manager Carlo Ancelotti chuan, "A tir aṭangin na takin kan nawr a, an theihna leh ṭhatna lai apiang kan chhu chat thei nghal vek. Goal kan khung bakah an player hnawhchhuah a ni a, goal tam zawk khung belh lo mah ila ka naute khelh danah ka lungawi," a ti.
Italian pachal chuan a pla-yer-te fak chhunzawmin, "Alonso khan a khel ṭha tak zet a, goal nawr tura tawlh hmatir a nih pawhin a buai phah lo a, a venghim tura a tawlh hnung pawhin a ṭha tho. Hnehna kan chan hi chuan inrintawkna kan neih belh ṭhin a, chutihrual erawh chuan hmasawnna tur chu nitin a awm reng," a ti.
Leipzig manager Hasenhuttl chuan, "Kan thlenchinah hian lungawi a ṭul a, 3-0 a kan chak loh avangin lungngaih lutuk tur a ni bik lo. Bundesliga-a team ṭha ber kan tum a, anni khan chak phu khawpin an khel ṭha zawk a ni. Allianz Arena-a chak loh hi keini tan chuan zirlai thar pawimawh tak a ni," tiin a sawi.
Tlawm lo Hoffenheim
Inkhel dangah Hoffenheim leh an mikhual Werder Bremen te chu goal khat ve ve khungin an inhneh tawk. Hoffenheim hian tun season league match 16 an khelh tawhah chak loh an la nei lo, anni chiah hi hneh loh tawng loa kum tawp khar tur an ni. League table-a pangana Hoffenheim hian vawi ruk hnehna changin an khingpuite nen vawi 10 an in draw thung.