Goal sarih khung thei Barcelona

Arda Turan-a hattrick hmangin Bar-celona chuan an mikhual Hercules 7-0 in an sawp a, first leg-ah 1-1 a an lo inhenhtawk tawh bawk avangin inkhel pahnih belhkhawmah Catalan club hi 8-1 in an tlang.

Copa del Rey last 16 lut turin Barca hian harsatna an nei lo, Nou Camp-a inkhelah Turan-a goal thum bakah Lucas Digne, Ivan Rakitic, Rafinha leh Paco Alcacer ten goal khat ṭheuh an khung bawk.

Luis Enrique-a'n khelmuala an in-hneh-tawkpui Hercules lakah a player khel tam lo zawkte a ring ngam. Captain Andres Iniesta chu bench-ah ṭhut chawlhtir a ni a, tlarhma lama a player langsar Lionel Messi, Neymar leh Luis Suarez te chu squad-ah pawh telh an ni lo.

Barca manager Enrique chuan, "Kan khingpui tur lakah kan fimkhur a, chutihrualin ka nau ṭhenkhat khel tlem zawk ten ṭha takin an khel thei tih an lantir avangin a lawmawm hle. Inkhel thunun mah ila hnehna chang tur chuan dawhtheihna neih a pawimawh zia kan zir chhuak a, second half-ah kha chuan kan khel ṭha takzet a ni," tiin a sawi.

Inkhel dangah Sevilla chuan an mikhual Formentera chu Luciano Vietto hattrick hmangin 9-1 in an sawp. Eibar, Osasuna, Valencia leh Deportivo de La Coruna te pawhin hnehna an chang bawk.