PSG chak niah Nice an chelh

Nice chuan French Ligue 1 hmahruaitu ni chungin thla-sik chawlh an hmang dawn. Nilani zan inkhelah Nice hi an khingpui Bordeaux nen goal awm loin an inhnehtawk a, inkhel dangah Paris St-Germain leh AS Monaco te chuan hnehna an chang thung.

Beisei anga season bulṭan ṭha lo PSG-in kumina an league match hnuhnung berah Lorient 5-0 in an sawp. PSG tan hian Thomas Meunier, Thiago Silva, Edison Cavani leh Lucas Moura ten goal khat ṭheuh an khung bakah Zargo Toure chuan an mahni lamah a ti lut bawk.

Paris Saint-Germain head coach Unai Emery chuan, "Inrintawkna kan nei a, kan khelh danah hmasawnna tam tak hmuh tur a awm bawk. Tun hnaiah kan inkhel hnem em em a, ka naute pawh an chau hle. Kumina kan match hnuhnung ber kan khelh dan hian min ti lawm a, kum tharah beiseina sang zawk nen kan inlan chhunzawm theih ngei ka beisei," a ti.

Nice-in minute 90 chhungin Bordeaux tlarhnung an su hawng thei lo a, injury time-ah striker Mario Balotelli leh midfielder Younes Belhanda te chu hnawhchhuah an ni. Nice hian point 44 hmuin hmahruaitu la ni mah se an hnuaia awm Monaco nen an inthlauhna chu point hnih chiah a ni tawh.

Inkhel dangah Monaco tan Radamel Falcao bawkin goal a khung leh ta. Lyon hneh lo hlim Monaco hian Colombia international striker Falcoa hmangin goal hmahruai an khung a, Chelsea leh Manchester United striker hlui hian tun season-ah league-ah goal 10 a khung ta. Monaco goal hnihna hi Tiemoue Bakayoko khung a ni thung.