Aizawl FC an inthuam tha

I League khel turin Aizawl FC an inthuam ṭha mek a, Mizo mipui ṭan tlak team din ngei an tum. January 7 khian I League khelh ṭan a ni dawn a, Mizo club hian Barasat Stadium, Kolkata-ah East Bengal an hmachhawn nghal ang.

Kolkata-ah zawk

I League hotute thu chhuak hmasa zawkah chuan Aizawl FC match hmasa ber hi RG Stadium, Mualpuia khelh tura ruahman a ni. Amaherawhchu league ṭan ni a nih bakah an match hmasa bera an khingpui tur East Bengal a nih bawk avangin live telecast leh chhan dang vangin inkhelhna hmun sawn a ni.

Season liam ta khan Aizawl FC-in an match hmasa ber Kolkata-ah an khel a, Barasat Stadium-ah Mohun Bagan 1-3 in an hneh lo. Season tawpah table-ah pariatnaah an awm a, Mizo club hnuaiah DSK Shivajians chiah awm mah se an chunga awm Salgaocar nen an point hmuh zat a inang a, Shillong Lajong an phak lohna pawh point hnih chauh a ni.

Beisei a sang

Aizawl FC-in Mizoram Premier League-ah player an nei ṭha tawk lo a, season hnih a zawna an champion hnuah final an lut zo lo. MPL champion turin I League club an
ṭha tawk lo a, amaherawhchu India ram pum huap inelnaah erawh team dang an ni ang - an ṭha sawt dawn.

AFC coach thar Khalid Jamil chuan, "Result ṭha chu kan beisei ngam ve tur a ni. Training-naah pawh player-ten an theihna zawng zawngin an khel a, nuam ka ti khawp mai. Kan match hmasa bera East Bengal kan hmachhawn hunah result ṭha kan beisei thei ang a, season tawpah a sang panga zingah awm phak kan tum ang," tiin result ṭha neih ngei a beisei thu a sawi.

Mumbai FC coach hlui Jamil chuan, "Team kan inthuam ṭha mek a, tuna kan neih sa bakah hian player dang kan la beisei a, puanzar vek a la rem lo. Goalkeeper, midfielder leh forward kan la lak belh dawn a, engkim a chiang thuai ang," tiin Vanglaini palai a hrilh.

AFC coach thar Jamil hian AFC pro coaching license a nei a, a kum la tam lo mah se I League-a tawnhriat nei ṭha ber zinga mi a ni.

An ṭha dawn

Aizawl FC-in season liam taa an foreign striker Alfred Kemah Jaryan an la let a, Liberian striker hian I League-ah tawnhriat a neih
ṭhat tawh bakah Federation Cup final an thlenna kawnga player pawimawh a ni. MPL club-in tlarhnung tichak turin Eze Kingsley an lalut a, Nigerian defender hi defensive midfield-ah pawh chhawr theih a ni a, kum 2012 aṭanga India rama che tla tawh a nih avangin a rintlak ang.

ISL club Delhi Dynamos aṭang-in defender Lalruatthara chu Mizo club-ah hian a kir a, DSK Shivajians aṭangin Mizo defender ṭha Zohmingliana Ralte an lalut bawk. Aizawl FC hian Chanmari West aṭangin MPL1 best player R. Laldanmawia an lalut tawh a, tualchhung club aṭangin player dang pahnih an la beisei bawk.

Aizawl FC goalkeeper Zothan-mawia'n MPL season ṭha takin a hmang a, amaherawhchu Lalawm-puia a la inhliam reng avangin keeper thar an mamawh. State dang aṭangin goalkeeper an lalut dawn a, an lakluh tur tak puanzar theih a la ni lo.

Foreigner pahnih an la lak belh dawn a, starting eleven-ah pali an chhawr theihna turin Asian pakhat an lak belh dawn - Indian football-a hming langsar tak a nih ngei hmel bawk.