A harsat ber ṭum a ni hial ang - Zama, Mizoram manager

Santosh Trophy North East Zone Qualifier-ah Mizoram chu Manipur leh Tripura te nen group khata an awm avangin final round thlen ringawt pawh an harsat dawn. Hei bakah hian AIFF lamin Santosh Trophy kalphung a thlak danglam avangin India ram state te tana football inelna lian ber hi a awlsam dawn lo.

Mizoram manager Lalthanzama Vanchhawng chuan, "Kumin Santosh Trophy-ah hian player 20 hruai theih a ni a, chung zinga player panga chu Under 21 an ni tur a ni. Kum 1997-a piang an nih kher a ngai a, 1997 hnu lama piang pawh player pangaah hian chhiar tel theih a ni lo. Under 21 player-te hi playing eleven-ah player pathum an awm ngei tur a ni a, thlak an ngaih pawhin Under 21 thoa thlak tur an ni. Under 21 player pathum an inhliam chauhin hriatthiamna dan awm," tiin dan thar chungchang Vanglaini palai a hrilh.

MFA registration vice chairman Zama chuan, "AIFF-in khauh taka dan an kaltlangpui tur thu an sawi a, keini tih theih chu dan zawm a ni. MFA registration-a 1997-a piangte chauh kan khelhtir dawn a, team ṭha zawk din duh avangin kum thlak danglamtir kan tum lo," tiin ṭha taka dan zawm an tum thu a sawi.

Inelna thlirlawkin Zama chuan, "Kumin hi Mizoram tan Santosh Trophy harsat ber ṭum a ni hial ang. Dan thar chhuah hian hmabak a tikhirh sawt a, Mizoramin football-a hma kan sawnna hi kawng leh lama thlir chuan harsatna belhchhahtu a ni thei bawk. Aizawl FC-in I League an khel dawn a, player ṭhahnem tak kan chan phawt. AFC player bakah hian MPL-a player langsar engemaw zatin phai club an zawm dawn bawk. Player tan phai club-a khelh hi an career atana a ṭhat avangin dan kan tum lo a, kan player neihte an ṭhat theih dan bera chhawr hi kan hna tur chu a ni," tiin an hmabak a awlsam loh thu a sawi.

Mizoram team hi Chanmari FC champion puitu coach Lalsang-zuala Hmar leh assistant coach Anand Gurung ten an kaihruai dawn a, manager-ah Chhinga Veng tlangval Lalthanzama Van-chhawng a awm bawk.