Tu zawkin nge semifinal khel dawn?

Mizoram Premier League Season 8-ah semifinal luh beiseiawm team paruk an awm, zanin dar 7:00 hian table-a palina hnuai chiaha awm pahnih FC Venghnuai leh Chanmari FC te an inkhel dawn. Chak zawk tan semifinal kawng a inhawng zau sawt ang a, chak lo tan knockout stage kawng a bum boh chho ang.

Chanmari FC hian lan dan chi hnih an nei a, pakhat chu khelmuala an lan dan niin pakhat leh chu table-a an awmna a ni. Coach nghet nei lo Chanmari FC hi tun dinhmunah panganaah an awm mek a, match hnuhnung pahnihah an chak lo bawk. An result hnuhnung leh table-a an awmna aṭanga thlir chuan team ṭha bera chhal theih an ni lo a, round 8 zawhah MPL tawp ta se semifinal khel lo tur an ni.

Chutihrualin an squad thlir chuan Chanmari hi an ṭha, Electric Veng coach Lalsangzuala Hmar chuan, "MPL-ah hian champion thei pahnih an awm, pakhat chu Chanmari," tiin an ṭhat thu Vanglaini a hrilh tawh. Coach tawnhriat nei ṭha Sanga sawi ang chiahin Chanmari hian goalkeeper aṭanga forward thlengin tawnhriat nei an kawl vek a, foreigner Godwin Quashiga an lak belh bawk avangin squad nei chhah ber zinga mi an ni.

Khelmualah pawh Chanmari hi an hmuhnawm a, Mizoram Police an hneh loh ṭumin chance insiam hnem zawk an ni. Manager Lalhmangaiha Sailo (Angaiha) chuan, "Kan khel ṭha a, kan vanduai ve a ni," tiin Vanglaini a hrilh a, inkhel entute chuan a thusawi dikna an hmu ang. 

Amaherawhchu, a pawimawh ber chu chak a ni a, FC Venghnuai nen pawh thusawi loin khelmualah zawk an chinfel a ṭul dawn. Hei vang tak hian keeper Zothanmawia, defender Lalrinchhana Tochhawng, midfielder Godwin leh forward MS Dawngliana te mawhphurhna a lian lehzual ang. 

A hun laia Mizo midfielder hmuhnawm ber zinga mi David Lalrinmuana an la kawl cheu. Zemabawk North tlangval hi ball a la pet thiam reng avangin Venghnuai tan freekick chawi a thiang lo.

FC Venghnuaiin I Day Football final an luh avangin an ṭhatna aia sangah an indah hman a, MPL match hmasa paliah hneh loh an tawn loh avangin mumang ramah an cheng chhunzawm zel. MPL club thar hian Kolasib-ah Aizawl FC an hmachhawn a, I League club hian Venghnuai hi an club dinhmun dik tak an hriat nawntir.

Hemi hnu hian Rindika Hmar leh a hoten attacking football aiin tlarhnung dah phui an ngai pawimawh ṭha leh a, round 7-ah Mizoram Police 1-0 a hnehin match hnuhnung berah Chhinga Veng nen an inhnehtawk leh bawk. Season hma inelna MFA Super Cup leh I Day Football ang thoin Venghnuai tan Vanlalthanga a la vul reng a, Chanmari FC tan pawh Hualngohmun tlangval ven uluk a ṭul ang.

Chutihrualin FC Venghnuai hi mimalah an innghat tih erawh a dik lo. Goalkeeper RS Lallawmzuala, defender Lalhlimpuia, midfielder Lalhmangaiha (Tetea) leh Isak Vanlalpeka te team tan an ṭangkai ṭhin a, MPL top scorer ni tawh Laldampuia an kawl tih hriat tel a ṭha bawk.

MPL ṭantirh aṭanga entu nei ṭha ber zinga mi ni thei reng Chanmari hian season tinin knockout round an la lut pha ziah a, player an neih ṭhat bakah team ti phurtu mipui thawhrah a tel. Tun season-ah Chanmari hian ṭantu an nei tam tawk lo a, ṭantu nei ṭha FC Venghnuai an hmachhawn dawn avangin an ṭan mar ṭhat leh a ṭul dawn.

FC Venghnuai hian round 5-ah Chanmari hi 2-1 in an hneh tawh lo a, tun ṭumah erawh semifinal luh an duh a nih chuan point hmuh ngei ngei a ṭul. Coach Rindika Hmar leh a player-te'n khelmuala an tih tur ang an tih theih nan Venghnuai mipui an pawimawh ang.