Didika hlim zanah Sena a ngui

Mizo tlangval Lalrindika Ralte chuan Indian Super League semifinal first leg-ah Atletico de Kolkata tan goal hmahruai a khung a, mikhual Mumbai City lakah a team chu 3-2 in hnehna a chanpui.

Didika goal khung zan hi Lalhmangaihsanga Ralte tan erawh zan duhawm lo a ni - North Mualcheng tlangval hian Portugal international hlui Helder Postiga a tihtluk avangin penalty a chawi a, Ian Hume chuan ATK chakna ni turin a khung.

Rabindra Sarobar Stadium, Kolkata-a inkhelah hian goal danglam, red card, penalty leh comeback ropui hmuh turin a awm vek a, inkhel hmuhnawm bik tih loh rual a ni lo. Kolkata club tan hlim taka chawlh hahdam hun erawh a la ni lo a, December 13 zanah Mumbai City khelmualah second leg an la khel leh dawn.

Inkhel chu

Minute 3 an khel hman chauh a, Mizo tlangval Didika hming lam nghal a ngai. Lunglei tlangval hian Borja Fernandez ball cross chu kil takah a tauh lut a, Bengaluru aṭanga Mumbai zawmtu keeper Amrinder Singh tan tih theih a tlem hle. Mahse, Mumbai-in tlawm an duh lo. Minute 19 chhungin Leo Costa leh Gerson Vieira hmangin goal hnih an khung a, ATK an hawihai.

Chawlhlawk hman nan minute ruk chauh a awm tawh tihah Didika bawk a inlar nawn leh a, I League lama East Bengal winger ball cross ṭha tak aṭanga ball kal zel chu Hume-a'n an si phurh sutna ni turin a khung. Minute 45 a ni tawh a, Sena Ralte a chesual. Mumbai tana bang rinawm hian Postiga a tih tluk avangin penalty a chawi a, Canada international Hume tan goal-a chantir turin harsatna a awm lo.

Mumbai City hian an striker Diego Forlan chu red card hmuh vangin an chhawr thei dawn lo a, Mumbai goal hnih hi Uruguay legend free kick aṭanga lut ve ve a ni a, Manchester United striker hlui hian second leg-ah ATK hi a lo mikhual ve theih dawn loh avangin Mumbai tan chuan channa nasa tak a ni.

Didika a hlim

Emerging Player of the Match-ah Didika thlan a ni a, ISL khelh mekah he dinhmun hi a vawi hnih luahna niin a goal hmasa ber a khung bawk. Lunglei tlangval Didika chuan, "Mumbai City hi ISL-a ka club hmasa ber a ni a, season hmasaa hliam vanga ka inlan theih loh lai pawha duat taka min enkawltu an ni. Mahse, football a ni a, eng team pawh hamchhawn ila a ṭha thei ang bera khelh zel ka duh. Tun ISL a ka goal hmasa ber ka khung avangin ka lawm takzet a ni," tiin a club hlui lama goal a khung vanga danglamna a neih loh thu Vanglaini palai hnenah a sawi.

Mizo tlangval chuan an inkhel leh tur thlirlawkin, "ISL hi team kan intluk tlan avangin hriatthiam a harsa a, Mumbai pawh theihtawp chhuaha an lo ṭan leh dawn avangin first leg-a kan chak vang maia final lut chiang sa anga indah theih a ni lo. Theihtawp kan chhuah leh ang a, Pathian zarah kan luh theih ka beisei," tiin a sawi a, champion lam an la ngaihtuah hman loh thu leh an inkhel leh tur chauhin a rilru a luah thu Vanglaini palai hnenah a hrilh bawk.

Didika hian ISL ṭantir lamah ATK a zawm lawk loh avangin hmun a chang lawk lo a, khelmuala a inlan chhunah rintlak a nihzia pholang mah se Chennaiyin nen an inkhelh ṭumin a inhliam leh a, match thum zet hliam vanga a chawlh hnua an match hmasa berah first eleven a chang lehnghal - an coach rin ngamna chu goal-in a chhang.

Mimal Lawmman

Emerging Player of the Match Lalrindika Ralte, Atletico de Kolkata

Hero of the Match Iain Hume, Atletico de Kolkata