Record siamtu Real dang thei an awm lo
Real Madrid chuan match 35 chhung chu ngam loh an tawng tawh lo - Zindedine Zidane-a naute hian Pathianni zan khan an mikhual Deportivo La Coruna chu 3-2 in an hneh a, injury time-a chakna goal khungtu chu Sergio Ramos a ni. Zidane-a naute hian hian 1988-89 season-a Dutch coach Leo Beenhakker hnuaia match 34 chhung tlawm hmel hmu loa Real an lo kal tawhna record chu an khum a ni.
Cristiano Ronaldo hahdam-tir a nih avanga an thiampuipa tel loa khel Real hi 2-1 in si phur zawkah an ṭang reng a, an mikhual team lehthal tura hun an mamawh zat chu minute ruk a ni. Real hian Ronaldo, Luka Modric, Karim Benzema leh inhliam Gareth Bale tel loin beisei an phak lo tih zep rual a ni lo.
Tlawm duh lo
Depor midfielder Celso Borges-a'n first half-a post a tauh per hnuah Real tan Alvaro Morata chuan minute 50-naah goal hmahruai a khung a, an hlim chhung erawh a rei lo. Depor tan substitute Joselu a inlar a, minute 63-naah an si phurh a sut a, minute hnih pawh a liam hmain Stoke City aṭanga loan-a Spanish club zawmtu hian an goal hnihna a khung chhunzawm!
Real-in Santiago Berna-beu-a mikhual tlangval rual ngam loh an duh lo a, theihtawp chhuahin an bei let. Hun tawp nan minute ruk chauh a awm tawh tihah Real substitue Ma-riano Diaz chet ve hun a thleng a, La Liga-a a goal hmasa ber chu an si phurh sut nan a khung. Real phur laklawh dan theih an ni lo a, Toni Kroos-a corner pet chu Ramos chuan an chakna ni turin injury time-ah a khung.
Beiseina nung
Real Madrid manager Zine-dine Zidane chuan, "Zanina kan inkhel ang chiah khan thil ropui tak kan ti thei tih kan chiang a, match 35 chhung tlawm hmel hmu loin kan kal tawh tih hriatna hian chakna min pe a ni. Engtikah emaw chuan kan la tlawm ve ang, mah se he team a thil ropui em em chu beiseina kan nei reng ṭhin hi a ni," tiin a naute khelh dan a chhuang hle.
Sergio Ramos chuan, "A tawp thlengin beih tur a ni a, chu chu rinna, phurna leh inpekna ten a zui phawt chuan kan duh ang takin thil a thleng mai a ni," a ti.
Real Madrid hian December 15-a Club World Cup semifinal khel turin Japan an pan nghal dawn a, South Korean club Jeonbuk Hyundai Motors leh Mexican club America inkhela chak zawk zawk an hmachhawn ang.
Barca chak awlsam
League match thum chhung a zawna an khingpui an inhnehtawkpui hnuah Barcelona chuan 3-0 in an mikhualna ramah Osasuna an sawp. Catalan club tan Luis Suarez-a'n goal hmahruai a khung hnuah Lionel Messi chuan goal hnih a khung chhunzawm ve bawk a, Argentina captain hian La Liga-ah goal 22 a khung leh der tawh! Barcelona tan captain Andres Iniesta hliam lo kir lehin awmzia a nei tih midfield-ah a lang nghal a, Luis Enrique naute hian ball 80% chang chungin hnehna an chang a ni.
Barcelona manager Luis Enrique chuan, "Chance tam tak kan insiam a, hnehna chan kha kan phu zawk a ni. Kan inkhel khan minti lawm a, ka naute khelh dan khan minti hlim takzet a ni. Game harsa tak kan hmachhawn dawn tih kan hria a, mah se nghah peih a ngai tih hre chungin dawhthei takin kan awm a, kan talbuai mai loh avangin goal khungna hun ṭha kan neih phah a ni," tiin an khelh dan chungchang a sawi.