Hamilton champion hun?

Pathianni zan dar 12:40 hian 2019 United States Grand Prix chu Circuit of the Americas-ah tlan a ni dawn a, driver championship hmahruaitu Lewis Hamilton tan title kawl lai humhim turin hmabak a tlem tawh hle.

Mercedes driver Hamilton hian a teammate Valtteri Bottas aiin point 22 in a hmu tlem zawk a nih ngawt loh chuan a vawi ruk nan world champion a ni dawn, season kal laia driver hmuhnawm ber hi dan theih loh tluk a ni tawh.

World champion vawi nga ni tawh Hamilton chuan, "Vawi nga ka champion ang tih kha ka ngaihtuah phak ngai lo, vawi ruk champion theihna hun a awm a nih chuan a lawmawm zual ang. Ka theihna sang leh ṭha ber ka la thleng loin ka hria a, hmasawn tumin ka bei zel ang," a ti.

Kum 34 mi Hamilton hi Formula 1 driver ropui berte zinga mi a ni tawh a, tun ang zela a che ṭha a nih chuan vawi sarih champion Michael Schumacher pawh a nihrual thei hial mai thei.