Wolfsburg hnehtu Bayern a chung berah

Thomas Muller-a'n minute 999 chhung zet goal a khung loh zawn tawhna record duhawm lo a thai bo! Germany international hian Wolfsburg lakah goal khat khungin Bayern Munich chu 5-0 in hnehna a chanpui - Bundesliga hmahruaitu an ni.

Allianz Arena-a inkhelah Carlo Ancelotti nauten a tir aṭanga a tawp thlengin inkhel an thunun a, league table mawngphah lama talbuai mek Wolfsburg lakah zahngaihna lantir loin a khat mawi tawkin goal an khung deuh reng.

Arjen Robben-a'n goal hma-hruai a khung hnuah Robert Lewan-dowski a inlar zui zat bawk. Poland international hian Arturo Vidal-a ball pet a lo thai luh zauh bakah Muller-a goal shot keeper Diego Benaglio-a'n a lo dan lo per chu a goal hnih nan a khung zui bawk.

Bayern-in an la duh tawk lo, goal thum an neih hnuah Muller leh Douglas Costa te hmangin goal an khung leh a, a zawna vawi nga league champion ni thei turin kawng dik an zawh mek.

Kum 28-a upa Lewandowski hian Bundesliga-ah goal 132 a khung ta. German player ni lo, ram dang player zingah he league bika goal khung hnem pathumna a ni; a tluk loh te chu Claudio Pizarro (190) leh Giovane Elber (133) te chiah an ni tawh.

Bayern Munich coach An-celotti chuan, "Thomas ka lawm-pui hle, chutihrualin ani hi chuan goal a khung lo a nih pawhin harsatna a awm lo - khelmual chhungah player pawimawh leh a ti ṭha berte zinga mi a ni ziah," tiin Muller chungchang a sawi.

Inrinni zan inkhel dangah kaithar RB Leipzig chu tun season league match-a a vawi khat nan an chak lo. Minute 12-naa Oliveira Bernardo goal khat khung hmangin Ralph Hasenhuttl-a naute hi Ingolstadt lakah 1-0 in an tlawm. Leipzig leh Bayern te hian point 33 ve ve an hmu a, goal difference nei ṭha zawk Bayern a chung zawkah an awm.

Dortmund chak zo lo

Thomas Tuchel-a enkawl Borus-sia Dortmund-in Cham-pions League lamah Real Madrid khumin group hmahruaitu ni thei mah se Bundesliga lamah beisei ang result an nei hleithei lo.

Inrinni zan khan Cologne nen RheinEnergieStadion-ah an inkhel a, mualneitu lam tan Artjoms Rudnevs chuan minute 28-naah league goal hmasa ber khungin a team hma a hruai pui a, hnehna an chang tlang dawn ni pawhin a lang hman. Dortmund hian injury time-a Marco Reus vangin point khat an hlawh chhuak hram.

Tuchel chuan, "Kan tan chuan Reus tluk hi an awm lo a, zaninah khan a chiang lehzual. A zawna result ṭha kan neih theih loh chhan hi tam tak a awm a, training kan neih ngawrh leh zual a ngai a ni," tiin a sawi.