Goal sur zanah City mualpho

Inrinni zan Premier League inkhel parukah mualneituin goal thum an khung tling vek. Champion lai Leicester City-in Jamie Vardy hattrick leh Andy King goal hmangin Manchester City 4-2 in an sawp a, La Liga leh Bundesliga-a manager hlawhtling Pep Guardiola meuh pawh England-ah a talbuai.

255 seconds!

City-in league-ah clean sheet vawi hnih chiah an la nei a, Foxes an hmachhawn ṭumin Spanish manager Pep-a'n phuahchawp takin tlarhnung a rem a, an mualpho.

Premier League match 10-a goal khung tawh lo Vardy-a'n minute thumna lekah goal hma-hruai a khung a, Andy King-a'n box pawn aṭangin a pet goal bawk. Goal hnih a luh hian second 255 chiah a la kal.

Minute 20-naah Vardy-a'n Foxes goal thumna a khung a, ball petu Riyad Mahrez ke
aṭanga ball chhuak a mawi hle. Hun tawp hma minute 12 a la awmin City defender John Stones a tihsual chu Vardy-a'n nangchingin hattrick siam nan a hmang a, English striker hian Leicester tana a hattrick hmasa ber a siam.

Hun tawp lamah Leicester an inthlah dul a, Aleksandar Kolarov leh Nolito ten goal khat ve ve khung mah se City mualphona a khuh zo lo.

Supporter tan

Leicester boss Claudio Ra-nieri chuan, "Leicester tak tak kan hmu. Kan sup-por-ter-ten min ṭawiawm ṭha a, tun hnaia result
ṭha kan neih loh avangin anmahni tan result ṭha hi kan mamawh a ni," tiin a sawi.

Foxes hian City hma hian Champions League-ah Porto 5-0 in an hneh lo a, an supporter-te chuan ticket man pek kir leh an dil hial. Inrinni zanah erawh result a dang a, Leicester ṭantute hian Man City an hneh lai hi ticket man pangngai letin an en duh hial ang.

Hun tam zawk

Manchester City manager Pep Guardiola chuan, "Season
ṭantirah kha chuan ka beisei aia hmain ka duh dan angin an khel thei a, tunah erawh besei angin kan khel lo. Kan rilru put hmang thlak turte leh kan duh anga khel tur chuan hun tam zawk kan mamawh ang," tiin hmasawnna tur an ngah thu a sawi.

Spanish manager chuan an khelh dan hmang a la rintawk reng thu a sawi a, an defender-te pawh an ṭhat tawk thu a sawi tel bawk.

Inkhel dang

Goal ruk luhna inkhelah mualneitu Hull City an ṭang tluan thei lo a, Crystal Palace tan hun tawp dawnah substitute Fraizer Campbell-a'n goal a khung a, 3-3 inkhel a tawp.

Inkhel dangah erawh mual-neitu an chak vek. Relegation battle-ah Swansea City-in Sunder-land 3-0 in an sawp a, Bob Bradley hoten relegation zone an chhuah san laiin David Moyes-a kaihhruai Black Cats erawh table mawngphahah an awm thung.

Watford-in an mualah Ever-ton 3-2 in an hneh a, hetiang zat tho hian Burnley-in AFC Bournemouth an hneh bawk.