Lalzuia Open-ah Ngopa che ṭha

Mizorama tennis inelna ngaihhlut berte zinga mi Lal­zuia Open chu Inrinni khan khelh zawh a ni a, Ngopa player an che ṭha hle. Men's singles final-ah Mizoram number 1 Ramengmawia, Ngopa Tennis Club (NTC) chu ranking-a a din­hmun sawhnghet turin a champion.

Men's final-ah Ram­eng­mawia hian NTC vek Mizoram number 3 Lalhmachhuana hma­chhawnin, hun harsa lu­tuk paltlang loin 6-3, 6-0 in hneh­na a chang. First set-ah Hmachhuana che ṭha chho viau mah se, tawnhriat ngah Enga a zam duh lo a, cool taka khelh chhunzawmin a tir lama Hmachhuana service a break sak hmang ṭangkaiin set a la zui.

Set hnihnaah Hma­chhuana'n hnehna chan ngei tumin, theihtawp rawn chhuah mah se, pressure zo zawk Ramengmawia a talbuai duh loa, harsatna em em nei loin Lalzuia Open champion ni turin 6-0 in a chak.

Womens' singles-ah chuan champion ngai bawk kan hmu a, NTC chhuanvawr HT Lalengmawii chuan vawi tam tak final-a a lo hneh tawh Sandhya Giri, Lunglei DTA chu 6-2 in a hneh a ni. Engi hian Mizoram hmeichhe tennis khawvelah ro a rel chhunzawm zel a, kum eng­emawzat chu hneh loh a tawng tawh lo a ni.

Kum bithliaha inelna lam­ah rawlthar duhawm JH Lalhruaizela a ropui a, under 14 leh under 18-ah a champion thei. Mizoram rawlthar zinga hma bak êng ber tia sawi ngam JH Lalhruaizela hian under 14 final-ah Malsawmtluanga, NTC chu 6-2 in a hneh a, under 18-ah pawh harsatna tawk loin Tlanmawia, Tuivamit Tennis Club chu 6-0, 6-1 in a hneh a ni.

Lalzuia Open Results

Mens Singles

Ramengmawia bt. Lalhmachhuana 6 - 2, 6 - 0

Womens Singles

HT Lalengmawii bt. Sandhya Giri 6 - 2

Under 18 (Boys)

JH Lalhruaizela bt. Tlanmawia 6 - 0, 6 - 1

Under 18 (Girls)

Sandhya Giri bt. Lalchhuanawmi 6 - 0

Under 14 (Boys)

JH Lalhruaizela bt. Malsawmtluanga 6 - 2

Under 14 (Girls)

Esther Lalthanpuii bt. Lalnunfeli 6 - 2