Mizoram Police-in MPL khel dawn
Mizoram chhunga football inelna sang ber Mizoram Premier League khel turin Mizoram Police FC an tling. Police hian Inrinni khan RG Stadium-ah New Serchhip FC 5-2 in an sawp a, MPL6 Qualifier champion an ni.
Police tan hian Lalbiakhlua (Biak-tea), V. Laltanpuia (Ṭ-a), Lalfak-awma, Lalfakzuala leh Lalbiak-nunga (Manunga) ten goal khat ṭheuh an khung a, New Serchhip FC tana Lalhlimawma leh Lalhriatzuala te goal khung chu mualpho hliah-khuhna chauh a ni.
MPL-ah Police
Mizoram Police hi MPL4-ah table mawngphahah awmin an relegate a, tun season-ah Aizawl DFA hnuaiah first division khelin roreltu an ni. Police Meet khel tura an zin chhuah avangin match zawnin an khel tam a, chu ti chung chuan Police hian point 34 hmuin league hmahruaitu an ni a, final-ah pawh Aizawl FC Academy chu 4-1 in an sawp.
Season ṭanna tournament MFA Super Cup-ah Police-in MPL club Chhinga Veng leh Dinthar FC an hneh thei a, team ṭha an ni tih a chiang. MPL6 Qualifier-ah pawh New Serchhip an sawp hma hian Venghlui FC chu 6-1 in an sawisa tawh a, point ruk hmuin an champion chiang hle.
Playoff khel tur?
Vawiin tlai dar 1:00 hian Lam-mualah Venghlui FC leh New Serchhip FC ten qualifier match hnu-hnung ber an khel dawn a, L&L Football champion New Serchhip-in goal difference an neih ṭhat zawk avangin playoff khel turin draw a tawk.
New Serchhip tan match hmasa berah Lalremruata'n (Arapa) leh C. Lalnuntluanga ten goal khung lo mah se an khel ṭha a, Venghlui FC hneh thei turin an ṭha tawk.
Aizawl DFA club Veng-hlui hi vanduai vang chauhin first division-ah final an lut tawh lo a, vawiinah point thum an hmu thei a nih chuan MPL5 pasarihna Ramhlun North an hmachhawn dawn.
Venghlui FC hian I Day Foot-ball-a pahnihna ni zo hlim Ramhlun North chu MFA Super Cup aṭangin an pet chhuak tawh a; Ramhlun North hian MPL Super Cup-a an hneh loh hi MPL Playoff-ah an hmachhawn nawn leh ang em?
ZoFooty Statistics
New Serchhip FC 2 - 5 Mizoram Police FC
NSFC : Lalhlimawma 54’; Lalhriatzuala 59’
MPFC : Lalbiakhlua 11’; V. Laltanpuia 28’; Lalfakzuala 29’;
Lalfakawma 33’; Lalbiaknunga 55’
52% Ball Possession 48%
14 Shots 14
6 On Target 9
0 Yellow Cards 2
0 Red Cards 1
Powered by Darchiauva Hardware, Mission Veng
MPL QUALIFIER FIXTURES & RESULTS
December 8, Lammual
Mizoram Police 6 - 1 Venghlui FC
MPFC : Lalfakawma 7'; Lalramtharmawia 37'; TC Vanlalhruaia 69';
Lalfakzuala 85'; V. Lalṭanpuia 88'; F. Lalrinpuia 89'
VFC : C. Lalmuanpuia 79'
December 10, RG Stadium
New Serchhip FC 2 - 5 Mizoram Police FC
NSFC : Lalhlimawma 54’; Lalhriatzuala 59’
MPFC : Lalbiakhlua 11’; V. Laltanpuia 28’; Lalfakzuala 29’;
Lalfakawma 33’; Lalbiaknunga 55’
Vawiin Inkhel Tur, Lammual
1:00 PM Venghlui FC vs New Serchhip FC
Team Dinhmun
# Team Pld W D L GF GA GD Pts
1 Mizoram Police FC 2 2 0 0 11 3 8 6
2 New Serchhip FC 1 0 0 1 2 5 -3 0
3 Venghlui FC 1 0 0 1 1 6 -5 0
MPL PLAY OFF FIXTURES
December 14, Lammual
Ramhlun North FC vs New Serchhip/Venghlui
December 16, Lammual
New Serchhip/Venghlui vs Ramhlun North FC