Ramhlun North-in Chhinga Veng an chelh

Nimin tlai Mizoram Premier League inkhelhah Ramhlun North leh Chhinga Veng te 1-1 in an inhnehtawk a, Chhingcows hi a suttu zawk an ni.

Lammuala inkhel hmuhnawm takah Lalmawizuala (Ashtea) penalty hmangin Ramhlun North-in minute 8-naah hma an hruai a, MC Malsawmzuala volley ṭha tak hmangin Chhinga Vengin minute 84-naah siphurh an sut. Ramhlun North-in an match hnuhnung berah Chawnpui FC an hneh a, Chhinga Veng lakah pawh bul ṭan ṭhain K. Lalthlahlova (Patea) kutin ball a fuh zarah penalty an hmu. Bethlehem Vengthlang tlangval Ashtea rawn pen chhuakin keeper Lalruatpuia bumin goal laiah a pet.

Chhinga Vengin siphurh sut tumin an nawr bet a, chutihrualin Ramhlun North hi bet mawl tawp an ni lo. Second half-a Lalnunzira Hnamte ball pet pawhin crossbar a pet per a, Ramhlun North-in point thum an hlawh chhuak teuh hle.

Amaherawhchu, team ṭha zawk Chhinga Vengin ball an chan tam rah sengin MC-a'n corner aṭanga a ball hmuh chu angle zim tak aṭangin a volley lut. Siaha tlangval hian tun season-ah goal riat a khung der tawh. Chhingcows hi siphurh suttu zawk ni mah se team dinhmun thlirin Lalremruata hote hian point hnih an hlohah a ngaih theih a, semifinal inchuh boruak a sang sawt ang.