Premier League a 'hot' zel

English football ngainatute tan kar tawpah mittlaina tur a awm leh ta a, zanin hian champion tuma inum ber Liverpool leh Manchester City an inlan leh dawn. 

Liverpool hian zanin dar 8:30-ah Aston Villa an lenchilh dawn a, zan dar 8:30-ah vek City chuan Southampton an mikhual bawk ang  - chak tura ngaih ve ve an ni. Jurgen Klopp leh a hoten table chung berah point rukin hma an hruai fal mek a, mahse City nen la inhmachhawn tur an nih avangin point ruk hi 'sang fal' tia sawina tur a ni lo. 

Chumiin a hrilhfiah chu game khat chetsual pawh a pawi tih hi a ni a, boruak a san chhoh dawn chauh avangin team pahnih tan point hmuh theihnaa ngaih team lakah tlawm a thiang lo. 

Liverpool-in league match riat a zawna hnehna an chan hnuin match kuanaah Manchester United chu 1-1 in an inchelh tir a, mahse hnual nan an hman phah lo. United hnuah fixture hautak nei zui mah se Champions League group stage-ah Genk chu 4-1 in an sawp a, league-ah team ṭha Tottenham Hotspur chu 2-1 in an hneh zui. 

League Cup-ah player naupang rual an chhawr chhungin Arsenal lakah goal nga an khung a, an lamah goal nga lut ve mah se penalty-ah 5-4 in an chak bawk. Naupang rual inkhel aṭanga lang chu Jurgen Klopp-a'n academy chhuak player aṭanga star player thlengin khelh dan phung nghet a tuh a, chu chu team-in a ṭhatpui.  

Liverpool defender duhawm Trent Alexander-Arnold chuan zaninah Aston Villa a hmachhawn a nih chuan Reds tana a match 100-na a khel dawn tihna a ni a, hriatreng tlak hun duhawm hi point thum hloh nan hman a duh lo ang. 

Arnold-a beiseina ti hlawhtling turin Mohamed Salah, Sadio Mane leh Roberto Firmino an ṭangkai leh dawn a, Salah hi Spurs lakah hliam vanga lakchhuah ngai ni mah se Villa a hmachhawn theih a rinawm. 

Arsenal nen an inhmachhawn ṭuma inhliam Naby Keita chu hlauhthawnawm khawpin inhliam lo mah se duhthlan tur an ngah tho avangin Klopp-a'n a awltir a rinawm - Georginio Wijnaldum leh Jordan Henderson an la awm. 

Fabinho hi yellow card a hmuh chuan an league match dawt leha City hmachhawn lo tur a nih dawn avangin a awltir a rinawm - Brazilian midfielder a awl chuan Hendo hi tawlh hnung deuhin Alex Oxlade-Chamberlain tan kawng a inhawng dawn tihna a ni. 

Wolves laka 2-0 a an tawlhthluk zeuh hnuin City an tlu hlen lo a, a hnuah inelna hrang hrangah match li khel leh tawhin an chak vek - goal 13 an khung a, an lamah goal hnih chiah a lut. City squad chhahzia sawi a ni fo a, Sergio Aguero te a dah ṭhat lai meuh pawhin Gabriel Jesus te ho an la awm tho a, Southampton tan hmachhawn an huphurhawm viau ang. 

Saints hian Leicester City chu kar hmasa khan 9-0 a ngam loin an mualpho a, League Cup-ah City hi hmachhawnin 3-1 in an tlawm zui. League Cup-a an intawnna inkhelah hian Aguero chuan goal hnih a khung a, zaninah chuan intawn hmasaka hahdamtir Kevin De Bruyne leh Raheem Sterling te an awm belh dawn bawk si a, Saints rilru a hah ṭan der ang!